Жас қазақстандық шабуылшы Данияда үздіктердің бірі атанды

Норвегиялық «Бродд» клубының 17 жастағы вингері Алдияр Омаров Данияда өткен халықаралық турнирде көзге түсті, деп хабарлайды ASnews.kz.

«Бродд» Скандинавиядағы ең танымал жасөспірімдер турнирлерінің бірі – Dana Cup бәсекесіне қатысты. Команда екі жас санатында (U17 және U19) өнер көрсетіп, «Дерби Каунти» (Англия), «Эгерсунд» (Норвегия), сондай-ақ 2025 жылы «алтын» ұтып алған «One Tanzanite» (Танзания) ұжымдарымен шеберлік байқасты.

«Астана» түлегі қос деңгейде де алаңға шықты. Жеті кездесуде қазақстандық ойыншы екі гол соғып, үш нәтижелі пас берді. Сондай-ақ бір эпизодта командасына пенальти алып берді.

17 жасқа дейінгі командалар арасындағы жарыста норвегиялық «Лиллехаммер» топ жарса, 19 жасқа дейінгі топта малилік CSB жеңімпаз атанды.

Алдияр Омаров Норвегияға 2024 жылы ауысқан болатын. Шабуылшы «Бродтың» жастар командасы сапында өнер көрсетеді.

«Бродтың» негізгі құрамы Норвегияның үшінші дивизионында бақ сынайды.