Матч орталығы
«Бұл соманы тіпті төрт айда да алған жоқ»: Скотт Манн – Джон ван ’т Схиптің жалақысы туралы
17 қараша, 22:09

ҚФФ бас хатшысы Скотт Манн ұлттық құраманың бұрынғы бас бапкері Джон ван ’т Схиптің ай сайынғы жалақысы тым жоғары деген БАҚ-тағы ақпараттарға түсініктеме берді, деп хабарлайды ASnews.kz.
«БАҚ-та таралып жатқан бас бапкердің жалақысы туралы ақпарат мүлдем шындыққа жанаспайды. Оның жалақысы Талғат Байсуфиновтың жалақысымен бір деңгейде. Ол одан артық та, кем де алмайды. Оның үстіне, бұқаралық ақпарат құралдары жазған соманы Джон ван ’т Схип тіпті төрт айлық жұмысында да алған жоқ», – деп мәлімдеді ҚФФ бас хатшысы Скотт Манн.
Еске сала кетейік, Джон ван ’т Схиптің жетекшілігімен Қазақстан құрамасы УЕФА Ұлттар лигасының C дивизионындағы топтық кезеңін сәтсіз өткізді. Турнирдің алты матчында ұлттық команда бірде-бір жеңіске жете алмай (үш тең ойын және үш жеңіліс), үш ұпай жинады және C3 квартетінде соңғы, төртінші орынға тұрақтады. Цикл аяқталғаннан кейін нидерландлық маман келісімшарт мерзімінің аяқталуына байланысты құраманың бас бапкері қызметінен кетті.
Ахмет Ержанов