«Ақша қызықтырған жоқ»: Чесноковтың агенті «Тобыл» мен «Хартстағы» жалақы айырмашылығы туралы

Футбол агенті Ярослав Зварич ASnews.kz деректі фильмінде Қазақстан құрамасының вингері Ислам Чесноковтың «Хартсқа» ауысуының егжей-тегжейін ашып, тұрмыстық нюанстар, қаржылай шарттар және шотландиялық клубпен болған алғашқы жабық келіссөздер туралы айтып берді.

Чесноковтың мотивациясы

«Ислам бірден Еуропадағы жалақының өзін қызықтырмайтынын айтты. Ол өзін сынап көріп, Еуропадағы футболдың қандай екенін білгісі келді. Сол кезде мен Исламға өзінде жақсы келісімшарт бар екенін айттым. «Хартста» жағдай әлдеқайда нашар болды деп айта алмаймын, бірақ Шотландияда өмір сүру деңгейі мүлдем басқа және шығын да көп. Тұтастай алғанда, тұрмыстық жағынан да, қаржылық жағынан да айырмашылық өте үлкен еді», – деді Зварич.

«Тобылдың» бас тартуы

«Хартс» оны өткен жылдың жазында, яғни ауысуға алты ай қалғанда-ақ сапына қосқысы келген. Клуб тіпті Исламның трансфері үшін өтемақы төлеуге де дайын болды. Жаңа бапкер келгенде басшылық Исламның маусым басталғанға дейін толыққанды оқу-жаттығу жиынын өткізгенін қалады. Ол кезде команда Испаниядағы ОЖЖ-ға жиналып жатқан.

«Хартс» Исламның маусым басталғанға дейін қосылуы үшін қолдан келгеннің бәрін жасады. Алайда Ислам ол кезде чемпионаттың екінші бөлігіне дайындалып жатқандықтан, «Тобыл» оны жібермеді», – деді агент.

Ислам Чесноков «Хартс» құрамын 2026 жылдың қаңтарында толықтырды. Эдинбургте өткізген жарты жылда 26 жастағы вингер барлық турнирде 11 матч өткізіп, бір жеңіс голын соқты және Шотландия чемпионатының күміс жүлдегері атанды.

2026 жылдың жазында жартылай қорғаушы қостанайлық «Тобылға» қайта оралды. Қазақстандық команда сапына оралғаннан кейін барлық турнирде сегіз кездесу өткізіп, екі нәтижелі пас беріп үлгерді.

«Өмірімде мұндайды сезінген емеспін»: Чесноков «Хартстағы» алғашқы голын еске алды