«Бұл эмоционалды шешім»: Алонсо – Сәтпаевтың кумирінің «Челсиге» оралуы туралы

«Челсидің» бас бапкері Хаби Алонсо Гонконгта «Ювентуске» қарсы өткен жолдастық кездесуде (0:1) вингер Михайло Мудриктің алаңға ұзақ уақыттан кейін қайта шығуына қатысты пікір білдірді.

Осы матчта лондондықтар сапында 17 жастағы қазақстандық шабуылшы Дастан Сәтпаев та өнер көрсетті, деп хабарлайды ASnews.kz.

«Жай ғана футболдан да маңыздырақ»

Украиналық вингер апта басында «көктердің» қатарына қосылып, командамен бар-жоғы екі жаттығу өткізген еді. Соған қарамастан, Алонсо туриндік клубқа қарсы спаррингтің соңында оған ойын уақытын беруді ұйғарды.

«Мен ол үшін өте қуаныштымын. Клубтағы әрбір адам үшін оны қайтадан іс үстінде көру – эмоционалды сәт болды. Ойын алдында Михайлоға 10–15 минут ойнай алатынын айтқанымда, ол шексіз қуанды. Осындай ұзақ үзілістен кейін бұл оның өзі үшін де, бәріміз үшін де керемет сезім.

Бұл жай ғана футболға қатысты шешім емес еді. Бұл оған серпін беру, көрсетілген зор қолдау мен алаңға шыққандағы ыстық ықыласты сезінуіне мүмкіндік беру үшін жасалған адами әрі эмоционалды қадам болды», – деді Хаби Алонсо матчтан кейінгі баспасөз мәслихатында.

Қазақстандық Дастан Сәтпаев 65-минутта Джейми Байноу-Гиттенстің орнына алаңға шығып, матчтың соңғы бөлігін Мудрикпен бірге өткізді.

Бұған дейін жас шабуылшы Мудрикті өзінің басты футболдағы кумирлерінің бірі ретінде атаған болатын. Сәтпаев украиналық футболшының жылдамдығын, техникасын және ойын стилін ерекше атап өтіп, онымен бір командада өнер көрсеткісі келетінін де жасырмаған еді.

Украиналық вингер допинг-сынамасынан мельдоний табылуына байланысты шеттету мен тексеру жұмыстары кесірінен 2024 жылдың желтоқсанынан бері алаңға шықпаған еді. Барлық мәселе Гонконгтағы турне алдында шешілді.

Қазақстан құрамасының 17 жастағы форварды маусымалды сборда «Челсидің» негізгі құрамы сапындағы үшінші матчын өткізіп, беделді SofaScore порталынан «көктер» арасындағы ең жоғары бағалардың бірін алды (7.0).

Ресейде Дастан Сәтпаевтың «Ювентуске» қарсы ойынына баға берілді

Дастан Сәтпаев: өмірбаяны, толық ақпарат, жалақысы, жеке өмірі. «Челси» сапындағы алғашқы голы