Сарапшы – Сәтпаевтың «Челсидегі» болашағы туралы: «Страсбурға» жалға беріледі

Ресейлік Okko Спорт комментаторы Владислав Прусов ASnews.kz басылымына берген сұхбатында «Челсидің» қазақстандық шабуылшысы Дастан Сәтпаевтың «Тоттенхэмге» қарсы жолдастық кездесудегі (1:2) ойынына баға берді.

«Эстевао кездесуді соншалықты жоғары деңгейде өткізді, Сәтпаевқа оның ойынын ұмыттыру қиын болды. Дегенмен ол жаман ойнаған жоқ – «Челси» тарбиеленушілерінің арасында көзге түсті. Ашығын айтсақ, дубльге қарағанда негізгі құраммен өзіңді көрсету оңайырақ. Дастан гол соғып үлгергендіктен, бойында сенімділік пайда болды.

Қазақстандық футболшының жалға берілетініне сенімдімін. Үлкен ықтималдықпен ол «Страсбурға» кетеді, онда өзі сияқты жас әрі дарынды футболшылармен бірге өседі. Бұл клуб – Еуропадағы карьераны бастау үшін өте тамаша платформа», – деп атап өтті Прусов.

17 жастағы Дастан Сәтпаев «Тоттенхэмге» қарсы бақылау матчына қатысып, алаңға 70-минутта «Челси» сапындағы жалғыз голдың авторы Эстеваоны алмастырып шықты. Бұған дейін «Қайраттың» түлегі австралиялық «Вестерн Сидней Уондерерс» қақпасына (6:4) гол соққан болатын.

«Страсбур» – Франция чемпионатының командасы. 2023 жылдың жазында Тодд Боэли бастаған BlueCo консорциумы бұл клубты сатып алғаннан кейін, ол іс жүзінде «Челсидің» фарм-клубы рөлін атқарып келеді.

Дастан Сәтпаев: өмірбаяны, толық ақпарат, жалақысы, жеке өмірі. «Челси» сапындағы алғашқы голы