Дастан Сәтпаев ойнайтын «Челси» 15 жастағы американдық шабуылшыны сатып алады

Лондондық «Челси» американдық «Далластан» 15 жастағы шабуылшы Бенджи Флауэрстың трансфері бойынша келісімге келді.

Техастық клуб Бенджимен 2030/31 маусымының соңына дейін алғашқы кәсіби келісімшартқа отырғанын ресми түрде жариялады (тағы бір жылға ұзарту мүмкіндігі бар). Бұл ретте, беделді The Athletic басылымының мәліметінше, «Даллас» ойыншының «Челсиге» болашақ трансферін келісіп қойған – Флауэрс 18 жасқа толған бойда Лондонға ауысады.

«Челси» бекітілген $3 млн төлейді, ал ойыншының жетістіктері үшін берілетін бонустарды қосқанда мәміле сомасы $10 млн-ға дейін өсуі мүмкін.

Флауэрс «Даллас» тарихында негізгі командамен келісімшарт жасасқан ең жас ойыншы атанды.

Ересектер футболында Бенджи «Норт Техас» фарм-клубы сапында 14 жас, 11 ай және 7 күнінде дебют жасады. Өткен айда ол MLS NEXT Барлық жұлдыздар матчының қатысушысы болып танылды.

Еске сала кетейік, алматылық «Қайраттың» түлегі Дастан Сәтпаев осы жазда «Челсиге» қосылып, лондондық клубтың базасында жаттығып, бейімделуден өтуде.

Ресми түрде қазақстандық шабуылшының келісімшарты тамыз айында – ол 18 жасқа толған бойда күшіне енеді. Осы сәтке дейін шабуылшы негізгі командамен жұмысын жалғастырып, бапкерлер штабына «көктердің» негізгі құрамына енуге дайын екенін дәлелдеуге тырысады.