Лондонға жолдама: EA SPORTS FC 26 бойынша Қазақстан чемпионы анықталды

Астанада Қазақ ұлттық спорт университетінің базасында EA SPORTS FC 26 дисциплинасы бойынша киберфутболдан Қазақстан чемпионатының LAN-финалы өтті, деп хабарлайды ASnews.kz.

Турнирдің шешуші кезеңінде елдің ең үздік сегіз ойыншысы плей-офф форматында (Ultimate Team FC Pro режимі) бақ сынасты. Тартысты матчтардың қорытындысы бойынша чемпиондық титулды Данияр «dan1k» Шарабадин жеңіп алды. Екінші орын Абылай «Abyl_Qazaqstan» Жанабергенге бұйырса, үздік үштікті Алишер «alish_back» Мұқанали түйіндеді.

Алтын жүлдеге ие болған Данияр Шарабадин UEFA eEURO 2026 халықаралық турнирінде Қазақстан атынан ресми түрде өнер көрсету құқығын иеленді.

«Ұйымдастырғаны үшін Қазақстан футбол федерациясына үлкен алғыс айтамын. Турнир өте жоғары деңгейде өтті. Бұған дейін жарыстар онлайн форматта өтетін, ал биыл LAN-форматта ұйымдастырылды. Мен үшін бұл үлкен тәжірибе әрі өз деңгейімді көрсетуге мүмкіндік болды. Биыл осымен екінші рет ресми турнирлерде жүлдегер атандым, бұл тек бастамасы екеніне сенімдімін. Қарашада Еуроға іріктеу кезеңі өтеді – жақсы дайындалып, жаңа деңгейге шыққым келеді және Қазақстан атынан лайықты өнер көрсеткім келеді», – деді жарыс жеңімпазы.

UEFA eEURO 2026 онлайн-топтық кезеңі 17-18 қазанда өтеді. Бұл кезеңде УЕФА-ға мүше 47 ұлттық ассоциацияның өкілдері финалға шығу үшін бақ сынайды.

Іріктеу қорытындысы бойынша ең үздік сегіз киберфутболшы 12 желтоқсанда Лондон қаласында өтетін eEURO 2026 турнирінің шешуші кезеңіне жолдама алады.