«Қарсылас тарапынан менсінбеушілік байқалады»: «Жайық» директоры «Қайратқа» қарсы матч туралы

Оралдық «Жайықтың» маркетинг жөніндегі директоры Асхат Ішмұхамбетов ASnews.kz сайтына берген сұхбатында Қазақстан Кубогының 1/16 финалы аясындағы «Қайратқа» қарсы ойыннан күтетін үмітімен бөлісті.

«Әрине, бұл клуб құрылғаннан бергі ең үлкен матчтардың бірі болмақ. Екінші лигада атқарған барлық жұмысымыз қазір өз жемісін беріп жатыр. Билеттер сатылымға шыққан сәттен бастап үш сағат ішінде толық сатылып кетті (солдаут). Бұл 8200 орын, бұл біздің еңбегіміздің көрсеткіші. Былтыр «Жайық» екінші лигада ең көп жанкүйер жинайтын клуб болды. Сандарға тоқталсақ, бұрын «Ақжайық» стадионына 2500 адам жинайтынбыз. Қазіргі Орал футболының тарихындағы ең жоғарғы көрсеткіш 5000 адам болған. Бүгінгі матч – тарихи оқиға.

Сондай-ақ стадионның ескі екеніне қарамастан, LED-борттар орнатып, жаңа көгал төсеп, стадион мен трибуна астындағы орындарды жөндегенімізді атап өткен жөн. Жаңа табло орнаттық. Сонымен қатар жаңа автобус сатып алып, оны брендтедік. Бүгін ҚФФ өкілі келіп, билеттердің толық сатылғаны мен жақсы жағдай жасалғанын бағалап кетті. Оралда үлкен дүрбелең болып жатыр. Тіпті ҚПЛ-дың өзінде матчтарға мұндай деңгейде дайындық жоқ. Ұйымдастыруға көмек ұсынғаны үшін әкімдікке алғыс айтамыз. Билет бағасының салыстырмалы түрде арзан болғанына қарамастан, мұндай ажиотажды күтпедік. Матчқа қаланың бірінші басшылары да қызығушылық танытып отыр. Оралда үлкен футбол мерекесі болады», – деді функционер.

Алдағы ойынның спорттық құрамдас бөлігіне тоқталған маркетинг жөніндегі директор оралдық ұжымның жоғары мотивациясын атап өтті:

«Команданың көңіл-күйі жауынгерлік, ал ондағы атмосфера тамаша. Былтыр біз жергілікті жігіттермен ойнап, чемпион атандық. Биылғы маусымда төрт жаңа ойыншы алып, команданы күшейттік. «Қайратты» немен жеңе аламыз? Объективті түрде алғанда, қарсыластың деңгейі жоғары, бірақ көңіл-күй үлкен рөл атқарады. Олардың тарапынан белгілі бір деңгейде менсінбеушілік байқалады. «Қайрат» еш жерде матчтың афишасын жарияламады, бәлкім, олар бізді мықты қарсылас ретінде көрмейтін шығар. Өз алаңымызда ойнаймыз, бас бапкеріміз Вячеслав Невольников – нағыз еңбекқор маман. Жаңа ойыншыларға да тәсіл мен жаттығу үрдісі ұнады. Бірінші лига командасы болғанымызға қарамастан, біз талапты төмендетпейміз. Команданың ұйымдастырылу деңгейі Қазақстанның топ-клубтарынан кем емес», – деп мәлімдеді Ішмұхамбетов.

Естеріңізге сала кетейік, Қазақстан Кубогының 1/16 финалындағы матч 8 сәуірде Оралда өтеді. БАҚ ақпаратынша, алматылық «Қайрат» пен елордалық «Астана» турнирдің бұл сатысындағы матчтарға негізгі құрамды шығармайды.

Айта кетейік, өткен маусымның қорытындысы бойынша оралдық «Жайық» екінші лиганың чемпионы атанған болатын.