Сарапшы – Покатиловтың Әзербайжанда алтын алу мүмкіндігі туралы: алдағы 20 күн шешуші болмақ

Әзербайжандық спорт сарапшысы Сүлеймен Велиев ASnews.kz порталына берген сұхбатында қазақстандық қақпашы Стас Покатилов өнер көрсететін бакулік «Сабах» клубының жергілікті чемпионатта жеңіске жету мүмкіндігін бағамдады.

«Маусымның аяқталуына 8 тур қалды, ал 10 ұпайлық айырмашылық – өте қомақты көрсеткіш. Рас, «Қарабақтың» қоржынында бір ойын бар, бірақ ықтимал жеті ұпайлық артықшылықтың өзі «Сабах» үшін өте қолайлы. Қазір қос команда үшін шешуші 20 күн басталмақ. Осы уақыт ішінде олар өзара үш рет кездеседі: екеуі Кубокта және біреуі лигада. Егер «Қарабақ» бұл жолы да чемпионат матчында «Сабахты» жеңе алмаса, бұл чемпиондық таластың іс жүзінде аяқталғанын білдіреді», – деп атап өтті Велиев.

Қазіргі таңда «Сабах» 25 матчта 62 ұпай жинап, Әзербайжан чемпионатында сенімді көш бастап келеді. Ал қазіргі чемпион – агдамдық «Қарабақ» 52 ұпаймен екінші орында тұр, әрі олардың еншісінде бір ойын бар.

Биылғы маусымда Стас Покатилов чемпионаттың барлық 25 матчында негізгі құрамда алаңға шықты. Покатиловтың қоржынында 11 «құрғақ» ойын бар, сондай-ақ ол өз қақпасына 17 доп өткізіп алған.