Ербол Қайыров «Таразға» жасалған қысым туралы: олар клубқа қарсы шара қолданса, менде де жауап табылады

Спорт журналисі әрі комментатор Ербол Қайыров өзінің кәсіби қызметіне байланысты «Тараз» ФК басшылығына қысым көрсетпек болған Қазақстан премьер-лигасы функционерлерінің наразылығына жауап берді, деп хабарлайды ASnews.kz.

«Бұған дейін мен ҚПЛ-дың бірнеше клубын сынға алып, инсайдтар жарияладым және белгілі бір мәселелердің бетін аштым. Осыдан кейін кейбір адамдар Дидар Сыдықбекке («Тараз» директорына – ред. ескертпесі) хабарласып: «кеңесшіңді тыныштандыр» деп айта бастаған. Мен оның қарамағындағы қызметкер емеспін. Дегенмен, ол адамдар мұның бәрін Сыдықбектің проблемасы деп санайды.

Иә, мен «Тараз» директорының кеңесшісі қызметін атқарамын, бірақ менің журналистік қызметімнің футбол клубына еш қатысы жоқ екендігін мәлімдегім келеді. Егер менің сынымнан кейін бұл адамдар «Таразға» қатысты қандай да бір шара қолданса, мен де жауап беруге дайын боламын. Дидар Сыдықбек пен «Тараз» клубының менің жеке ұстанымыма еш қатысы жоқ», – деді Қайыров.

Еске салайық, Ербол Қайыров медиадағы жұмысын «Тараз» футбол клубы директорының кеңесшісі қызметімен қатар алып жүр. Өз кезегінде, жамбылдық команданың басшысы орнын белгілі медиаменеджер әрі экс-футболшы Дидар Сыдықбек иеленіп отыр.