Қытайлық сарапшы Сорокиннің «Чэндуге» ауысу себебін түсіндірді: қорғаушы үшін «алтын жас»

Қытайлық журналист әрі футбол сарапшысы Цинь Цицзюнь ASnews.kz сайтына берген сұхбатында «Қайраттың» бұрынғы қорғаушысы Егор Сорокиннің Қытай Суперлигасындағы «Чэнду Жунчэн» клубына ауысуына қатысты пікір білдірді.

«Менің ойымша, «Чэнду Жунчэн» – жанкүйерлер базасы ең мықты және Қытайдағы ойын қарқыны ең жоғары клубтардың бірі. Олар жоғары нәтижелерге қол жеткізуді көздейді. Команда АФК (Азия Чемпиондар лигасы) деңгейіндегі жарыстарға қатысушылар қатарында, бұл құрамды жасақтауға деген жауапкершілікті арттырады.

Қытайға келетін легионерлердің көбісінде болатындай, бұл трансфердің қаржыға қатысы болуы мүмкін, бірақ мен ол тек ақша табу үшін келді деп айтпас едім. Чэндуде ол Азия Чемпиондар лигасында маңызды ойындар өткізе алады».

Сарапшы Қытай чемпионаты Сорокин үшін келесі деңгейге өту баспалдағы болуы мүмкін деп есептейді.

«Егер ол «Чэндуде» жақсы өнер көрсетсе, Еуропаға қайта оралуы немесе Батыс Азия лигаларына – Сауд Арабиясы мен Катарға ауысуы әбден мүмкін».

Цинь Цицзюнь ойыншының деңгейін жоғары бағалап, оның «Қайраттағы» өнері мен еуропалық грандтарға қарсы тәжірибесін атап өтті.

«Оның деңгейі Қытай Суперлигасында ойнауға толық жетеді. Сорокин өзінің тәжірибесімен қорғанысқа пайда әкеле алады. Біз білетіндей, ол Қазақстанның үздік командасы – «Қайратта» ойнады, «Арсенал» және «Реал Мадрид» сияқты клубтарға қарсы тұрды.

30 жас – қорғаушы үшін «алтын жас». Оның менталитеті мен физикалық жағдайы «Чэндуге» үлкен көмек болады. Клуб үшін бұл – еуропалық футбол мектебінен шыққан легионермен толығу деген сөз», – деді Цицзюнь.

Егор Сорокин «Қайратқа» 2024 жылдың жазында қосылған. Алматылық клуб сапында бір жарым маусым өнер көрсеткен 30 жастағы қорғаушы барлық турнирлерде 54 ойынға қатысып, екі гол соқты және екі нәтижелі пас берді. Ол командамен бірге 2024 және 2025 жылғы Қазақстан чемпионы атанды.

Сорокиннің жаңа клубы – «Чэнду Жунчэн» өткен маусымда Қытай чемпионатында үшінші орын алып, Азияның екінші Чемпиондар лигасының іріктеу ойындарына қатысу құқығына ие болды.