«Хан-Тәңірі» – Мұхаметәлидің жағдайы туралы: онымен толық есеп айырысамыз

Алматылық «Хан-Тәңірі» клубы ASnews.kz тілшісіне жартылай қорғаушы Хамза Мұхаметәлидің мәлімдемесіне қатысты пікір білдірді.

Клуб басшылығы жылдың басында қаржылай қиындықтардың болғанын мойындады, алайда өз міндетінен бас тартпайтынын жеткізді.

«Футболшы біздің клубта жалға алу негізінде ойнады және «Жеңіс» клубында тіркелген болатын. Біз өз тарапымыздан міндеттерімізді орындап, операцияға ай сайын қаражат аударып отырдық. Қаңтар айында кешігу болды, бірақ алдағы уақытта уақытылы түсуі тиіс. Онымен толық есеп айырысуды жоспарлап отырмыз.

Біз ойыншымен үнемі байланыстамыз, өткен аптада Мұхаметәлимен базада жолықтық. Бұл мәселе жақын арада шешіледі деп үміттенеміз», – деп хабарлады клуб өкілдері.

Transfermarkt порталының дерегіне сүйенсек, Хамза Мұхаметәли «Хан-Тәңіріне» еркін агент ретінде ауысқан.

Бұған дейін Қазақстанның жасөспірімдер құрамаларында ойнаған футболшы өмір сүру үшін қонақүйде ресепшнде жұмыс істеуге мәжбүр екенін айтқан болатын.

Футболшының айтуынша, тізе байламдары (крест байламдары) үзілгеннен кейін клубтың кепілдігімен операцияға несие алған, алайда олар тек алғашқы айдың ақшасые ғана төлеген. Мұхаметалидың сөзінше, қоңыраулары жауапсыз қалып, жалақысы төленбей отыр, соның салдарынан толыққанды оңалту курсынан өте алмай жүр екен.