«Юнайтед» ФК-дағы қазақ – Пирло туралы: ешқашан оның ұрысқанын көрмедім

«Юнайтед» футбол клубының маркетологы әрі SMM-маманы Темірлан Сандыбаев ASnews.kz сайтына берген сұхбатында ффутбол әлеміне танымал команданың бас бапкері Андреа Пирло туралы айтып берді.

«Пирло – сабырлы, көп сөйлемейтін адам. Академия басшысы Лука Антонинимен қаны бір болғанымен, мінездері мүлде бөлек. Антонини – қарапайым, ашық-жарқын, көңілді жан, ал Пирлоның эмоциясын оқу мүмкін емес. Ол әрдайым өзін ұстай біледі. Әлі күнге дейін оның қатты қуанып немесе айқайлап жатқанын көрген емеспін.

Соған қарамастан, жанкүйерлер Андреаның соңынан қалмай жүргенде, ол ешқашан суретке түсуден бас тартпайды. Қолтаңба сұраса да береді, тіпті жеңілістен кейін іші күйіп тұрса да. Сондықтан жетістіктеріне қарамастан, оның осындай қарапайым әрі сыйластықты сақтай білетіні мені таңғалдырады», – деді Сандыбаев.

Степногорск қаласының тумасы саналатын жас маман өткен жылдың жазында «Юнайтед» клубына қосылып, БАӘ клубтарынлағы алғашқы қазақстандық маман атанды. Бұл – Сандыбаевтың футбол саласындағы дебюті.

Атақты италиялық маман клуб тізгінін «Сампдориядан» кеткеннен кейін қолға алған. Футболшы ретінде Пирло «Интер», «Милан» және «Ювентус» клубтарында өнер көрсетіп, Чемпиондар лигасын және әлем чемпионатын жеңіп алған.

Қазіргі таңда оның командасы БАӘ-нің екінші дивизионындағы турнир кестесінде бірінші орында тұр.