«Валенсиядағы» қазақстандықтар: академияның үздіктері гол соғудан жарысуда

Қазақстандық жас футболшылар Ғабидолла Оразалы мен Назар Доля испаниялық «Валенсия» академиясында нәтижелі ойын көрсетіп жүр, деп хабарлайды ASnews.kz.

13 жастағы Ғабидолла шабуылдың сол қапталында өнер көрсетеді. Бұған дейін «Айбын» мен «Астанада» ойнаған ол MICFootball 2025 халықаралық турнирінің алтын жүлдегері атанып, The Carnaval Cup жарысының үздік ойыншысы болған. Осы маусымда «жарқанаттар» сапында 14 матчта 11 гол соқты.

Айта кетейік, Ғабидолла LALIGA Futures жарысына да қатысқан. Онда қонақ ретінде «Интер», «Ювентус» және ПСЖ секілді грандтар бақ сынаған болатын. Вингер антропометриялық деректерімен ерекшеленеді: өз жасында бойы 175 сантиметрге жуықтаған.

Назар Доля – Орал қаласының тумасы, 12 жаста. Ол да шабуыл шебінде ойнайды. «Валенсияға» ауысқанға дейін «Леванте» жүйесінде тәлім алған. Қазіргі таңда 8 ойында соғылған 3 голы бар. Назар Испанияда әжесімен бірге тұрады және тілді жетік меңгерген. Ол Оразалыдан бір жас кіші топта өнер көрсетеді.

Еске салайық, Валенсия аймағындағы түрлі командаларда тағы бірнеше отандасымыз доп тебеді: Сәлім Хасанов («Вильярреал»), Әлижан Юн («Эльче»), Алдияр Нұрғали және Шыңғыс Қалиев (екеуі де – «Леванте»).

«Әлем чемпионатын армандаймын»: «Левантедегі» Нұрғали – Ла Лигадағы дебюті және Сәтпаев туралы.