«Левен» клубының қызметкері – Бельгия жайлы: «алтын буынның» дәуірі бітті, олардан ұпай алуға болады

Бельгиялық «Левен» клубының диджитал-менеджері Қасым Халиев BorodAbata.kz (AS News) тілшісіне берген сұхбатында Қазақстан мен «қызыл сойқандар» арасындағы матч туралы пікір білдірді.

«Осы күнге дейін біздің кеңседе Қазақстан құрамасы мен «Қайрат» туралы ешкім естіген жоқ. Бастапқыда олар біздің Еуроға бір табан жақын болғанымызға қатты таңғалды, содан кейін маған әртүрлі сұрақтар қоя бастады. Мен оларға «Ақтөбе» мен QJ League туралы да айттым, бірақ әлемде, әрине, қазақтар Бельгияда да танымал емес. Қазақтар туралы «Генкте» ғана білетін шығар, өйткені ол жақта біздің Шахмұрат ойнайды.

Жергілікті жанкүйерлер бүгінгі матчтан не күтеді? Барлығы оңай жеңіске жетеміз деп отыр – олар әлі күнге дейін Бельгияның «алтын буыны» жоғалған жоқ деп есептейді. Менің ойымша, біздің команданың үш болмаса да, кемінде бір ұпай алуға мүмкіндігі бар. Бельгия соңғы жылдары әлсіреді: ойыншылардың жеке шеберлігіне қарамастан, алаң ортасында баланс жоқ, қорғаныста нақты проблемалар бар. Себебі қазір Компани мен Вертонген секілді мықтылар жоқ», - деді қазақстандық контент-мейкер.

Бүгін бельгиялықтар Әли Әлиевтің шәкірттерін Брюссельдегі «Лотто-Паркта» қабылдайды. 2026 жылғы әлем чемпионатының іріктеу кезеңі аясындағы ойын сағат 23:45-те басталады.

Халиев 2012 жылы Батыс Еуропаға аттанды. Маркетолог және видеооператор мамандығын алған қазақстандық азамат Universal Music-те оқуын аяқтап, содан кейін бельгиялық клубта қызмет атқарды.