Беллами – Астанадағы матч туралы: 2026 жылғы ӘЧ-на шыққымыз келеді

Уэльс құрамасының бас бапкері Крейг Беллами BorodAbata.kz (AS News) тілшісі Әлім Динасыловпен Қазақстанға қарсы алдағы ойын туралы әңгімелесіп, британдық командалардың Астанадағы қиындықтары туралы өз ойымен бөлісті.

– Әдетте британдық командаларға Астанада ойнау қиынға соғады: Солтүстік Ирландия, Шотландия, тіпті ағылшындар.

– Қай ағылшын командасы? – деді Беллами.

– «Манчестер Юнайтед».

– Шынымен бе?

– Иә. 2019 жылы олар мұнда 1:2 есебімен жеңілді. Бірақ бұл жай әңгіме болсын деп. Сұрақ: Сіз бұл жағдайда қандай да бір қосымша қысымды сезінесіз бе?

– «Юнайтед» қазіргі уақытта көптеген командаларға қарсы қиындықты бастан кешіруде. Жоқ, дәлелдейтін ештеңеміз жоқ. Өткен жылдардың нәтижесі артықшылық та, кемшілік те емес. Барлығы алаңда шешіледі.

Осыдан кейін Беллами дайындық туралы мынадай түсініктеме берді:

– Кардиффтегі Қазақстанға қарсы кездесу біз үшін ауыр сынақ болды. Біз көп күш жұмсадық, бірақ команда қайта бабына келді. Жақсы дайындалдық, күшті және осал тұстарымызды да сараладық. Футболда ойынның қалай өтетінін ешқашан білмейсіз: әртүрлі сценарийлер бар және сіз бұған дайын болуыңыз керек.

Дәл осы жайт әр матчты қызықты етеді, толқу тудырады. Міне, біз үлкен турнирге шығу үшін келдік. Мақсатымыз – АҚШ, Канада және Мексикада өтетін әлем чемпионаты. Мен сонда болдым, ол жақта климат пен жаттығуға мүлдем басқаша жағдай жасалады. Бірақ біз сонда барғымыз келеді.

Соңғы бес іріктеу кезеңінде біз үш рет турнирлерге жолдама алдық. Мұнымен тоқтап қалмаймыз. Ертең қиын матч, басқалай болуы мүмкін емес. Бірақ біз дайынбыз, алға қарай жүргіміз келеді.

Қазақстан мен Уэльс ойыны 4 қыркүйек күні сағат 19:00-де «Астана Аренада» өтеді. Кардиффтегі алғашқы кездесу 3:1 есебімен алаң иелерінің пайдасына аяқталды.