Әлиев – Уэльспен болатын ойын жайлы: Тапалов пен Чесноков көмектесе алмайды

Қазақстан құрамасының бас бапкері Әли Әлиев Уэльске қарсы ойын алдындағы баспасөз мәслихатында команданың дайындығына қатысты пікір білдірді, деп хабарлайды BorodAbata.kz (AS News).

«Біріншіден, барлығына осы матчқа дайындыққа көмектескені үшін алғыс айтқым келеді. Біз футболшыларымыздың ойынын тамашалау үшін барлық қалаларды араладық. Осы тұста клубтардың басшылығына алғыс айтамын – фитнес жағынан да, тактика жағынан да ойыншылар прогресс жасады, мұны жаттықтырушылар штабы анық байқады. Ойыншылар оқу-жаттығу жиынына жақсы көңіл-күймен және үлкен шабытпен келді.

Өкінішке орай, шығын жоқ емес. Еркін Тапалов күнтізбенің тығыздығына байланысты қатардан шығып қалды. Ислам Чесноковтың да шамалы проблемалары бар, сондықтан біз Уэльс пен Бельгияға қарсы ойындағы стратегияға сүйене отырып, нақты шешім қабылдаймыз. Жаттықтырушылар мен клуб басшыларына көрсеткен көмектері үшін тағы да алғыс айтамын – олардың әрқайсысы дайындыққа өз үлестерін қосты», – деді Әлиев.

Қазақстан – Уэльс ойыны 4 қыркүйек күні сағат 19:00-де «Астана Аренада» өтеді.