Кенжебек – Самородовпен бәсекелестігі жайлы: Демек, мен де үздік футболшымын

Словкияның «Кошице» клубында ойнап жүрген Ғалымжан Кенжебек YouTube-тағы BorodAbata арнасына берген сұхбатында Қазақстан құрамасындағы бәсекелесі Максим Самородов жайлы ойымен бөлісті.

Максим – ұлттық құрамадағы тікелей бәсекелесім. Бір позицияда ойнаймыз. Бірақ екеуміз де шабуылдың қос қапталында және ортасында ойнай аламыз. Бірақ Макс қазір ұлттық құраманың бірінші нөмірлі футболшысы. Ал өзімнің артықшылықтарымды өзім білемін. Оны айтпай-ақ қояйын. Тәкаппар деп ойлап қалар. Оны жанкүйерлер, бапкерлер анықтай жатар.

Максим үшін өте қуаныштымын. Ресейдегі статистикасы керемет. Онымен бәсекелес болғаным менің де жақсы футболшы екенімді білдіреді.

– Ұлттық құрамада жүргенде Максим екеуің бір-біріңмен әзілдесесіңдер ме?

«Мен сенен мықтымын, сен әлсізсің» деп әзілдеспейміз. Басқа жігіттермен де солай. Максим «Кошицеге» кеткен кезімде: «ол жаққа қалай кетіп қалдың?» деп әзілдеді. Бірақ ойын сапасына қатысты әзіл айтпаймыз. Қазақстан мықты команда болмағандықтан, біріккен кезде ғана жеңіске жете аламыз. Жеке шеберлікпен ұтатындай деңгейде емеспіз.

– Ұлттық құрамада жиі әзіл айтатын футболшы кім?

Нұралы Әліп. Онымен бірге жүрсең, күлкің тиылмайды. Бірақ алаңда мүлдем басқа адамға айналады. Нурик осы уақытқа дейін бірге ойнаған футболшылардың ішіндегі ең үздігі деп ойлаймын.

– Сені ұлттық құрамаға алғаш рет Станислав Черчеов шақырды. Ол кісі жайлы ойың қандай?

Станислав Саламұлына тек рахмет айта аламын. Өйткені мен сол бапкердің тұсында дебют жасадым. Ал команда ішінде ол кісі жайлы жаман әңгімелер естімедім.