Ермұхаммед Мәулен: Скуртул ҚФФ-да айына 10 миллион теңге алады

Қазақстан құрамасының бұрынғы баспасөз хатшысы Ермұхамед Мәулен еліміздің жастар құрамаларында жұмыс істейтін жаттықтырушылар мен шетелдік мамандардың рөлі туралы тағы да мәселе көтерді, деп хабарлайды ASnews.kz.

«Менің мәліметім бойынша, ҚФФ-ның техникалық директоры Геннадий Скуртул айына 10 миллион теңге алады. Шынымен де бұл қызметте жұмыс істей алатын өз мамандарымыз жоқ па? Әрине, бар», – деді Мәулен.

Функционердің айтуынша, жасөспірімдер құрамасындағы жағдай күрделі сұрақтар туғызып отыр.

«Неге қазақстандық мамандарды жұмысқа алмайды? Жасөспірімдер құрамасының барлығын қараңыздар: U-15, U-16, U-17, U-19, U-21. Бұл бес командада бірде-бір қазақ бапкері жоқ. Бұл нағыз шовинизм», – деп қосты ол.

Бұған дейін ҚПЛ клубтарының экс-бапкері Дмитрий Огай да осы мәселеге қатысты пікір білдіріп, жастар құрамасында жергілікті мамандар жұмыс істеуі керектігін айтқан болатын.