«Қазақ мамандар тағайындалуы керек»: сарапшы ҚФФ-дағы молдовалықтарды қатаң сынға алды

Қазақстан премьер-лигасының бұрынғы футбол төрешісі әрі экс-инспекторы Серік Қошқаров ASnews.kz сайтына берген сұхбатында Қазақстан футбол федерациясы (ҚФФ) құрылымында жұмыс істейтін шетелдік мамандардың қызметіне қатысты қатаң пікір білдірді.

«Молдовалық мамандар біздің федерацияда жұмыс жасайды. Қандай себеппен олар сол қызметте? Біз өз қарсыластарымызды қоректендіріп отырмыз ғой. Бұл балалар мен жасөспірімдер, жастар футболына кедергі әкелуі мүмкін. Кешегі ойын бәрін көрсетті. Айлықтары да үлкен деген хабар болды. Ондай сомаларды беру үшін қандай жынды болу керек? Олар бір ауыр заттар көтеріп, қара еңбек жасап жүр ме? Бұл ұят нәрсе ғой. Олар бізге күліп жатыр. Геннадий Скуртул, Игорь Шпанера мен Дмитрий Васильев қызметінен кетуі керек. Бұл позицияларда қазақ жігіттер де жұмыс жасай алады. Оларға қомақты қаржы керек та емес. Шетелдік мамандардың пайдасы қандай? Олар біздің менталитетті білмейді.

Бас бапкерлікке де қазақстандық маман қажет. Талғат Байсуфинов, Алмас Құлшынбаев, Нүркен Мазбаев сияқты дисциплинаны түзеп, менталитетті білетін мамандар қажет.

Молдовалық мамандар қандай жұмыс жасап жатыр? Басшылық қай жаққа қарап жатыр? Ойға қонбайтын нәрсе ғой бұл. Испаниядан, Ұлыбританиядан, Франциядан, Италиядан мамандар келетін болса, түсінетін едім. Бірақ Молдова – тура біз сияқты. Бұның мағынасы қандай сонда? Одан да, өз мамандарымызға сеніп, жұмыс істеуге мүмкіндік берейік», – деді Қошқаров.

Қазақстан футбол федерациясы мен QJ League құрылымында жұмыс істейтін молдовалық мамандардың қатарында Геннадий Скуртул ҚФФ техникалық департаментінің директоры ретінде жасөспірімдер мен бұқаралық футболды дамыту және УЕФА мен ФИФА стандарттары бойынша бапкерлерді оқыту бағдарламаларына жетекшілік етсе, Игорь Шпанера федерацияның техникалық сарапшысы әрі бапкерлік курстардың нұсқаушысы және QJ League спорттық-аналитикалық блогының маманы қызметін атқарады, ал тренер-аналитик Дмитрий Васильев QJ League жобалары мен ҚФФ пен ФИФА-ның жас таланттарды дамыту бастамаларына қатысқан.

Еске сала кетсек, Ұлттар лигасының бесінші туры аясындағы Қазақстан мен Молдова құрамаларының матчынан кейін айтылды. 2026 жылдың 13 қарашасында Кишиневтегі «Зимбру» стадионында өткен кездесу алаң иелерінің 2:1 есебімен жеңісімен аяқталды. Ойында молдовалық шабуылшы Петру Попеску 39-минутта есеп ашса, екінші таймның басында Ислам Чесноков таразы басын теңестірді. Алайда 77-минутта Петру Попеску дубль жасап, Молдоваға жеңіс әкелді.

«Бұл – бапкердің жеңілісі»: Шалекенов Қазақстан құрамасының Молдовадан ұтылуы туралы