Қазақстан U-19 құрамасы Бельгиямен лайықты ойнағанымен, Еуро іріктеуінде есе жіберді

Футболдан Қазақстан жастар құрамасы U-1) Еуропа чемпионаты іріктеу турнирінің екінші турында Бельгия құрамасына 0:2 есебімен жол берді, деп хабарлайды ASnews.kz. Матч Шотландияда өтті.

Қорытынды есепке қарамастан, қазақстандық команда сапалы футбол көрсетіп, мықты қарсыласқа тең дәрежеде қарсы тұрды. Жігіттер бірнеше қауіпті шабуыл ұйымдастырып, бельгиялықтардың қақпасына 11 соққы бағыттады (оның 5-і тура барды), ал жалпы соққылар саны бойынша қарсыласынан аз ғана қалып қойды (13).

Ойын тағдыры екінші таймда шешілді. Бельгия құрамасының жартылай қорғаушысы Огюст Де Ваннемакер жеке шеберлігімен көзге түсті: ол 58-минутта есеп ашса, 75-минутта пенальтиді сәтті орындап, дубль авторы атанды және кездесудің нүктесін қойды – 0:2.

Осы жеңілістен кейін Қазақстан құрамасы 2-топтың турнирлік кестесінде соңғы төртінші орынға сырғыды. Төрттікте Бельгия көш бастап тұр (6 ұпай).

Қазақстандық жастар Шотландиядағы мини-турнирдегі соңғы матчын 17 қараша күні Косово құрамасына қарсы өткізеді.