«Спорт-Экспресс» тілшісі – Зайнутдиновтың трансфері туралы: екі жақ та ұтылған жоқ

Ресейлік «Спорт-Экспресс» порталының тілшісі Микеле Антонов BorodAbata.kz сайтына берген сұхбатында Қазақстан құрамасының жартылай қорғаушысы Бақтиер Зайнутдиновтың «Динамоға» ауысуына қатысты пікір білдірді.

«Менің ойымша, бұл екі жаққа да тиімді трансфер. Иә, Баханың Ресейден кеткенде айтқаны есімізде: ол еурокубокте ойнап, арманына қарай ұмтылғысы келді. Бірақ бірқатар себептерге, атап айтсақ, жарақат және басқа да жағдайларға байланысты ол өзінің потенциалын толықтай көрсете алмады. Ол еурододада жеті матч өткізді, бірақ ақыр соңында қайтадан Ресейге оралды.

Қазіргі уақытта «Динамо» жаңа бас бапкердің идеясымен қайта құрылуда, ал Зайнутдинов осы уақытқа дейін Карпинмен жұмыс істеп үлгерді – бұл жақсы симбиоз болуы мүмкін. Әсіресе, «Динамо» қорғанысының мықты емес екенін ескерсек. Оң жақта Касерес ойнаса, сол қапталдағы Скопинцев, менің білуімше, Карпинге мүлдем сәйкес келмейді. Ол шабуылда жақсы, бірақ қорғаныста жаттықтырушының талаптарын орындай бермейді. Лаксальт жарақат алды, ал Баха сол қапталда да, орталықта да ойнай алады.

Оның жан-жақтылығы үлкен артықшылық. Осы тұрғыдан алғанда, «Динамоға» ауысуы оның мансабы үшін үлкен пайда, себебі бұл Түркиядағы қиын кезеңнен кейін қайта өзіне келудің жақсы тәсілі болуы мүмкін деп ойлаймын», – деді Антонов.

28 шілдеде мәскеулік «Динамо» Зайнутдиновтың трансфері туралы хабарлаған болатын. Келесі күні футболшы Ресей кубогы аясында «Сочиге» қарсы ойында дебют жасады.