Кенжебек – Испанияға жасаған дублі жайлы: Бұл жақсы нәтиже деп ойлаймын

Қазақстан құрамасының шабуылшысы Ғалымжан Кенжебек YouTube-тағы BorodAbata арнасына берген сұхбатында Испания жастар құрамасына соққан қос голын есіне алды.

Бұл матч әлі есімде. Себебі мұндай ойындар менің мансабымда көп болмады. Испанияға екі гол соғу жақсы нәтиже деп ойлаймын. Тіпті сол күннің қалай өткені де есімде. Әдеттегідей матчқа бардық. Гол соғу ойымда да болған жоқ. Испания секілді мықты командаға қарсы жақсы ойнау туралы ғана ой болды. Олардың құрамында «Барселонаның» ойыншылары бар. Қазір «Севильяның» негізгі құрамында ойнап жүрген футболшылар өнер көрсетті.

Автобуста бара жатып, жігіттерден «Қазақстан үлкен бе, әлде, Испания ма?» деп сұрадым. Артымда отырған Дамир [Қасаболат]: «сен қуасың ба, Испания, Италия, Португалияны қоссаң да, Қазақстанға жетпейді» деп айтты. Сондай кішкентай болса да, футболы қатты дамыған.

Сол екі голдан кейін көбісі мені тани бастады. Бірақ оған дейін де мен жайлы білген деп ойлаймын. Себебі Қазақстанның U-17, U-19 құрамаларында да ойнадым.

– Қазақстан құрамасының қазіргі бапкері Әли Әлиев сені ұлттық құрамаға шақырып жүр. Ол кісімен жеке сөйлестің бе? Қояр талаптары қандай?

Иә, Әли Ханәлиұлымен жеке сөйлестім. Бізден не қалайтынын, қандай ойын көргісі келетінін айтты. Айтқанын орындауға тырыстым. Уэльспен болған матчта аз ойнадым. Бірақ одан кейінгі ойында көп уақыт берді. Жаттығу барысында өнерімді көрсетіп, келесі матчтарда да көбірек ойнауға тырысамын.

Кенжебек Қазақстан жастар (U-21) құрамасында 7 матчқа қатысып, 2 гол соқты. Ал ұлттық құрама сапына Станислав Черчесовтың кезінен бері шақыртылып жүр.