Ван ’т Схип – Фарерге қарсы ойын туралы: жауапкершілікті өз мойныма аламын, ел үшін күресеміз

Қазақстан ұлттық құрамасының бас бапкері Джон ван ’т Схип матч алдындағы баспасөз мәслихатында Фарер аралдарына қарсы ойын жайлы пікірімен бөлісіп, Молдовадан жеңілу себептерін түсіндірді және бапкерлер штабын таңдау мәселесіне тоқталды, деп хабарлайды ASnews.kz.

Молдовадан жеңілу және жауапкершілік туралы

«Әрине, Молдоваға қарсы соңғы ойындағы нәтижеге көңіліміз толмайды. Ойыншылармен сөйлестік, Қазақстандағы барлық жанкүйерлеріміздің де қатты ренжулі екенін түсінеміз. Ертеңгі ойында жағдайды түзеп, нәтиже үшін күресу – өз қолымызда. Мұны барынша тәртіппен, ойынды жақсарта алатын барлық амалдарды қолдана отырып жасауымыз керек. Мен мұнда көмектесу үшін келдім, бапкер ретіндегі жұмысым осы. Әрине, жауапкершілікті өз мойныма аламын. Біз жағдайды жақсарту үшін қолдан келгеннің бәрін жасап жатырмыз. Кешегі және бүгінгі жаттығуларға қарап, жігіттердің зейіні барынша шоғырланғанын көріп отырмын».

Жергілікті көмекшілерді таңдау туралы

«Неліктен өзіммен бірге көмекші әкелмедім? Мен бұл мәселені федерациямен талқыладым және қазіргі бапкерлер штабының жұмысына толықтай қанағаттанамын. Олар – жоғары деңгейдегі мамандар. Мен басынан-ақ қазақстандық бапкерлермен жұмыс істегім келді. Біз тамыз айында жұмысты бастадық, олардың кәсібилігін көрдім және нақты айта аламын: нәтиженің болмауы менің өз көмекшілерімді әкелмегеніме мүлдем қатысты емес. Жергілікті мамандарды таңдауымның бір себебі – олар барлық қазақстандық ойыншыларды жақсы біледі. Біз матчтарды қараймыз, видеоларды талдаймыз және шешімді бірге қабылдаймыз, бірақ соңғы жауапкершілік бәрібір менің мойнымда».

Тактика мен Кенжебектің рөлі туралы

«Молдовамен ойынның бірінші таймында біз тым тартыншақтап ойнадық. Допты үнемі артқа беру туралы тапсырма болған жоқ. Біз алға ұмтылғымыз келді, алайда мүмкіндіктерді өте аз жасадық. Ал екінші таймда ойын өзгеріп, қауіпті сәттер, пастар, қақпаға соққылар көбейді. Өкінішке қарай, біз ойынды осылай бастай алмадық. Ертең осы қарқынды басынан бастап көрсеткіміз келеді, бірақ бақылауды да ұмытпау қажет, өйткені Фарер аралдары қарымта шабуылда өте қауіпті.

Кенжебекке келетін болсақ, ойынға тереңдік қосу үшін оны оң қапталға шығардым. Астановпен бірінші таймда бұл нәрсе жетіспеді. Кенжебек қапталдан көп доп алды және өз міндетін орындап шықты. Қақпа алдында дұрыс позиция таңдау бойынша әлі де жұмыс істеуіміз керек, бірақ ол шабуылға тереңдік бере алды».

Тығыз күнтізбе мен Покатиловтың алмасуы туралы

«Қысқа уақыт ішінде төрт ойын өткіземіз. Бұл барлық командаларға ортақ мәселе. Көптеген бапкерлер мен клубтар мұндай күнтізбеге наразы, өйткені жиі ұшу мен жүктемелер ойыншылардың жарақат алу қаупін арттырады. Бізге осы жағдайға бейімделуге тура келеді, сондықтан ертең құрамда жаңа ойыншылар шығуы мүмкін. Қақпашыға келетін болсақ, жиі ұшу мен жинақталған шаршаудың әсерінен қақпашылар бапкерімен және Стас Покатиловтың өзімен ақылдаса отырып, оны алмастыру туралы шешім қабылдадық».

Қазақстан мен Фарер аралдары құрамалары арасындағы УЕФА Ұлттар лигасының матчы 6 қазанда Астанада өтеді. Бұған дейін Джон ван ’т Схип шәкірттері өз алаңында Молдоваға 1:2 есебімен жол берген болатын.

Қазақстан құрамасының қорғаушысы: Молдоваға қарсы агрессивті футбол жетіспеді