Молдова футбол федерациясының құрметті президенті: ең бастысы – Қазақстанмен тең түспеу

Молдова футбол федерациясының құрметті президенті Павел Чебану ASnews.kz тілшісіне берген сұхбатында Қазақстан құрамасы Ұлттар лигасының тобында көш бастауы мүмкін екенін мәлімдеді.

Молдова мен Қазақстан – тағдырлас командалар ма?

«Молдова сияқты Қазақстанның да еншісінде бір-ақ ұпай бар. Біздің командаларымыз шынымен де ұқсас: құрам жасарып жатыр, ойыншылар клубтарда тұрақты практика алмайды... Біз Фарер аралдарына қарсы ойынның бірінші таймын толығымен сәтсіз өткіздік, бірақ екінші таймда басым түстік (1:1). Бір ұпай алып кеткендері олардың жолы болғаны. Сол 45 минут жақсы нәтижеге үміт сыйлады, бірақ жалпы алғанда – бастапқы жағдайымыз бірдей.

Бәлкім, қазақстандықтардың артықшылығы – өз үйінде ойнайтынында болар, бірақ Еуропадағы матчтарға қарасақ, стадиондар бұрынғыдай лық толы болмайды. Бұрынғыдай ажиотаж жоқ. Мен тең нәтижеге бәс тігер едім. Осыдан төрт жыл бұрынғы плей-аутта да нәтиже ұқсас болғанына назар аударыңыздар: алдымен қазақтар жеңеді (2:1), кейін негізгі уақытта біз жеңіске жеттік (0:1).

Молдовалықтар физикалық дайындыққа басымдық берілген кеңестік мектептен алыстап кетті. Бұрын біз осы қасиетімізбен жеңіске жететінбіз. Ал қазір академиялық испандық модельге көштік, бұл, меніңше, дұрыс емес. Бұрынғы жүйеге қайта оралу керек, өйткені физикалық тұрғыдан жақсы дамыған футболшы өзін тамаша сезінеді және доптан қашпайды.

Біреулер қазақтардың тәжірибесі мол дейтін шығар, бірақ Фарер аралдары оларға қарсы жаман ойнаған жоқ (1:1). Жалпы, қазір бәрі футбол ойнауды үйренді – аралдықтар анық аутсайдер емес», – деді 71 жастағы сарапшы.

Тең ойнауға болмайды – словактар жағдайды пайдаланып кетеді

«Төрт команда да шамамен бірдей деңгейде. Бір кездері Словакия керемет құрама еді, бірақ қазір олай емес. Егер біз екі-үш жыл бұрынғы құраммен оларға қарсы ойнағанымызда, сенімді түрде жеңіске жетер едік. Өкінішке қарай, көбісі жай ғана карьерасын аяқтады. Егер Польшадан кейін жігіттер Чехияны өткенде, Еуроға жолдама алатын еді.

Бәрі ұпайға ұпай сай келіп шешіледі. Бүгін кім жеңсе, сол бірінші орын үшін күреседі, алайда матчты тең аяқтасақ, онда словактардың басымдығы едәуір артады».

Еуропада кеңестік Қазақстанды қалай еске алады

«Мен қазақстандық футболмен жақсы таныспын. «Нистру» (қазіргі «Зимбру» – ескерт.) жартылай қорғаушысы болған кезімде Сейілда Байшақов, Құралбек Ордабаев, Виктор Абгольц, Юсуп Шадиев сияқты ірі тұлғалармен алаңда кездестім... Кеңес жылдарында «Қайрат» өте мықты еді. Қарағанды мен Целиноградқа бару ұнайтын.

Ол кезде біз Домодедоводан ауысып ұшсақ та, екі күн сайын ойнай беретінбіз. Ештеңе етпеді – жүгіретінбіз, ал қазір бәрі шаршап қалады (күледі)», – деп қосты Чебану.

Еске сала кетейік, 2 қазанда Қазақстан құрамасы «Астана Аренада» Молдоваға қарсы ойнайды. Ұлттар лигасы топтық кезеңінің үшінші тур матчы сағат 19:00-де басталады. Командалар C3 квартетінде үшінші және төртінші орындарда тұр.

Павел Чебану – соңғы 50 жылдағы Молдованың үздік футболшысына берілетін УЕФА мерейтойлық марапатының иегері. Маман 1997 жылдан 2019 жылға дейін МФФ-ны басқарды. 2015 жылы жоғары мемлекеттік награда – Республика орденін алды.

ҚПЛ экс-легионері Қазақстанның Словакияны қуып жету мүмкіндігін бағалады