Ұстабаев – Зайнутдиновтың «Динамоға» ауысуы жайлы: Карпин оны Еуропаға жіберуге уәде берді

Бақтиер Зайнутдиновтың бірінші бапкері Рахмон Ұстабаев BorodAbata.kz сайтына берген сұхбатында жартылай қорғаушының «Динамоға» ауысуы мүмкіндігін бағалап, оның болашағы жайлы пікір білдірді.

«Ресейге оралу, әрине, артқа қарай жасалған қадам. Түркия мен Ресей чемпионаттарының айырмашылығы бірден байқалады: түрік лигасы күшті, топ-клубтардың құрамы мықты футболшылармен жасақталған, ойын деңгейі де жоғары. Ресейлік клубтар қазір еурододаға қатыспайды, демек ол жақтағы қарқын мен бәсекелестіктің деңгейі мүлдем басқаша», – деді Ұстабаев.

Дегенмен, ол РПЛ ойыншы үшін өтпелі кезең болуы мүмкін деп санайды:

«Бактиердың мүмкіндігі бар: егер ол «Динамомен» келісімшартқа отырса, Карпин оны емдеп, қалпына келтіремін деп уәде берді. Ал Еуропадан ұсыныстар түссе, оны жібереді. Қазір ешқандай клуб футболшыларды тегін бермейді, олардың трансфері үшін ақша төлеу керек, бірақ Бақтиер тағы да мықты чемпионатта ойнап, ұлттық құрама сапында жақсы өнер көрсетемін деп үміттенеді. Барлығы Алланың қалауымен – қалай болатынын көре жатармыз».

Зайнутдинов бұған дейін Ресей Премьер-лигасында ойнаған және турнирдің деңгейін жақсы біледі, бұл оның тез қалыпқа келуіне және еуропалық клубтардың назарына ілінуіне көмектеседі.

Ресейлік БАҚ бір күн бұрын «Динамоның» футболшы үшін 2,5 миллион еуро төлеуге дайын екенін хабарлаған.