«Алаңда қой сойғанда теріс қарап тұрдық»: «Қайраттың» бұрынғы ойыншысы Қазақстанды еске алды

Словакия құрамасы мен алматылық «Қайраттың» бұрынғы қорғаушысы Любомир Михалик Ұлттар лигасындағы Словакия және Қазақстан құрамалары арасындағы матч қарсаңында Šport.sk порталына үлкен сұхбат берді.

Онда ол ерекше салт-дәстүрлер, Владимир Вайсстың мұрасы және қазақстандық футболдың дамуы туралы айтып берді, деп хабарлайды ASnews.kz.

Қой союға қатысты таңғаларлық ритуалдар туралы

«Біз, еуропалықтар үшін бұл өте таңғаларлық жайт болды, ал олар үшін – әбден қалыпты ритуал. Команданың жағдайы нашарлаған кезде, олар алаңның ортасында қой соятын. Содан кейін оның қанымен тізелерін немесе жарақаттанған жерлерін сүртетін. Бұл олардың мәдениетінің бір бөлігі. Біз бапкер Владимир Вайсспен бірге бұған қатысқан жоқпыз. Олар іске кіріскен кезде, біз жай ғана теріс айналып тұрдық, өйткені оған қарау ауыр болды».

Жанкүйерлер махаббаты мен Вайсс үшін төгілген көз жасы

«Вайсс Қазақстанда керемет ізін қалдырды. Жанкүйерлер оны харизмасы мен адамгершілігі үшін қатты жақсы көрді. Ол клубтан кетіп бара жатқанда, әуежайда қалың топ жиналды – олар кәдімгідей жылап, оны еліне жібергісі келмеді. Ол онда қыруар шаруа атқарды, кәсіби клубты іргетасынан бастап қалап шықты».

ҚПЛ-дағы қаржы туралы

«Қазақстан – өте үлкен ел. Біз бірде-бір сырт алаңдағы матчқа автобуспен барған емеспіз. Әрбір сапарға ішкі рейспен ұшатын едік, ол екі сағатқа дейін созылуы мүмкін еді. Ұшақ біз үшін автобус сияқты болды.

Ал ақшаға келетін болсақ, онда Словакияда біздің түсімізге де кірмейтін сомалар айналымда жүреді. Бұл қаржы әлемдік жұлдыздарды тартады – мысалы, қазір «Ақтөбе» сапында «Манчестер Юнайтедпен» бірге Чемпиондар лигасын жеңген Нани ойнап жүр».

Дастан Сәтпаев туралы

«Қазақстан енді футболдағы әлсіз команда емес. Олардың футболы үлкен прогресті бастан өткеруде. Құрамында нағыз жауынгер ойыншылар мен қызықты легионерлер бар. Оларға менсінбей қарауға мүмкіндігіміз жоқ. Олардың деңгейінің тамаша мысалы – «Челси» 4 миллион еуроға сатып алған, ал қазір Чемпионшипте «Бернли» сапында өнер көрсетіп жүрген Дастан Сәтпаев».

Словакия және Қазақстан құрамалары арасындағы УЕФА Ұлттар лигасының екінші тур матчы 29 қыркүйекте өтеді. Ойын Словакияның Кошице қаласындағы стадионда өтеді және Астана уақытымен 23:45-те басталады.