Белгілі молдовалық бапкер: Қазақстан құрамасы Словакиядан қорықпауы керек

Молдова құрамасының бұрынғы футболшысы, «Ақжайықтың» экс-бапкері Игорь Пикущак ASnews.kz сайтына берген сұхбатында Қазақстан құрамасының Ұлттар лигасындағы Словакияға қарсы ойындағы мүмкіндігін бағалады.

«Қазақстан құрамасының жаңа бапкері қандай талап қоятынын білмеймін. Дегенмен Словакия мен Молдова арасындағы кездесуге (2:0) қарап, Қазақстанның мүмкіндігі бар деп ойлаймын. Біздің команда бірнеше рет жылдам шабуыл ұйымдастырғанымен, оны голға айналдыра алмады. Негізінен словактарға жеке шеберлік тұрғысынан жол беріп қойдық.

Жекпе-жектердің көбінде жеңіліп, қарсыластарға бізді оңай алдап өтуге мүмкіндік бердік. Бар мәселе осында болды. Қазіргі Словакия құрамасынан қорқудың қажеті жоқ. Алайда олардың қорғаныстан шабуылға жылдам шығатынын ескеріп, соған дайын болу маңызды. Меніңше, бұл – олардың басты қаруы. Ал топтың фавориті үшінші турдан кейін анықталады», – деді 43 жастағы маман.

29 қыркүйекте Қазақстан құрамасы Ұлттар лигасы топтық кезеңінің екінші турында сырт алаңда Словакиямен кездеседі. Ал алғашқы ойында Джон ван ’т Схип шәкірттері Фарер аралдарымен тең түскен болатын.

Игорь Пикущак қазіргі таңда Арменияның «Сюник» клубын жаттықтырады. 2022 жылы молдовалық маман Оралдың «Ақжайық» командасында еңбек етті. Футболшы ретінде ол «Шериф» пен «Краснодар» секілді танымал клубтардың сапында өнер көрсетті.