«Словакияның жеңісін күтемін»: «Қайсар» қақпашысы – Қазақстанға қарсы ойын жайлы

Қызылордалық «Қайсардың» словакиялық қақпашысы Адам Ковач ASnews.kz сайтына берген сұхбатында Словакия мен Қазақстан құрамалары арасындағы Ұлттар лигасының матчы жайлы пікірімен бөлісті.

«Бұл ауыр ойын болады, бірақ мен Словакия жеңеді деп күтемін. Біздің бұл топта жеңіске жетуге деген амбициямыз зор және өз алаңымызда ойнау артықшылығы бізге қатты көмектеседі деп сенемін», – деді Ковач.

Чемпионаттар арасындағы айырмашылық туралы айта келе, қақпашы лигалардың стилистикалық ерекшеліктеріне тоқталды:

«Менің ойымша, футбол стилі аса қатты ерекшеленбейді. Мен көріп тұрған ең үлкен айырмашылық: Словакиядағы футбол тактикалық жағынан өте жақсы ұйымдастырылған және көбінесе позициялық сипатқа ие. Ал қазақстандық футбол – өте динамикалы, жылдам ауысулар мен қарымта шабуылдарға толы. Қаржылық жағынан да, ойыншылардың сапасы жағынан да әрқашан да көш бастап тұрған братиславалық «Слован» мен ДАК-ты қоспағанда, лигалардың жалпы деңгейі өте ұқсас».

Алматылық «Қайраттың» бұрынғы бапкері Владимир Вайсстың Словакия құрамасының тізгініне қайта оралуын бағалай отырып, голкипер оның зор беделін атап өтті:

«Оны ең үздік словакиялық бапкер – тәжірибелі әрі қатты құрметке ие маман деп санаймын. Біздегі адамдардың көпшілігі бұл өзгерістерге қатты қуанды және оң көзқараспен қабылдады. Бұл – бірінші кезекте нәтижені ойлайтын бапкер. Біздің команда оның жетекшілігімен жақсырақ ойнайтынына сенемін, өйткені ол командаға жеңіске жетуге шын мәнінде көмектесе алатын футболшыларды ғана пайдаланады», – деді Ковач.

26 жастағы Адам Ковач «Қайсар» сапына 2026 жылдың қаңтарында тәжікстандық «Вахштан» еркін агент мәртебесінде ауысып келген. Бұған дейін қақпашы бірқатар кипрлік, чехиялық және словакиялық клубтарда өнер көрсетті. Биылғы маусымда голкипер «қасқырлар» сапында барлық жарыста 10 матч өткізді.

Қыркүйектің соңында Джон ван ’т Схиптің жетекшілігімен Қазақстан құрамасы УЕФА Ұлттар лигасының жаңа маусымындағы жорығын бастайды. Күзгі ойындар күнтізбесі Фарер аралдары (26 қыркүйек) және Словакияға (29 қыркүйекте Кошицеде) қарсы сырт алаңдағы матчтармен басталады, содан кейін қазақстандықтар өз алаңында Молдова (2 қазан) мен Фарер аралдарын (6 қазан) қабылдайды.

«Фаворит рөлін қабылдаймыз»: Словакия құрамасының қақпашысы Қазақстанмен өтетін матч туралы