Бір команданың үстемдігі: Қазақстан құрамаларына ең көп ойыншы берген қай клуб?

Extra:Time Telegram-арнасы ауқымды зерттеу жүргізіп, Қазақстанның барлық футбол құрамаларындағы (жасөспірімдерден бастап ұлттық құрамаға дейін) клубтық өкілдікті есептеп шықты.

Шақырту алған барлық футболшылардың жартысына жуығы алматылық «Қайраттың» мектебінен өткені белгілі болды. Бұл туралы ASnews.kz хабарлайды.

«Қайратқа» тең келер ешкім жоқ

Зерттеу авторлары барлығы 126 ойыншы шақырту алған бес құраманың (U15, U17, U19, U21 және ұлттық құрама) құрамына талдау жасаған.

Бұл тізімде «Қайрат» сөзсіз көш бастап тұр: қазіргі құрамдарда алматылық клубтың 43 белсенді ойыншысы бар (34,1%). Ал қазір басқа командаларда ойнап жүргендерді қоса алғанда, «сары-қаралардың» барлық түлектерін есептесек, бұл көрсеткіш 56 адамға жетеді – бұл ұлттық құрамаларға шақырылған барлық ойыншылардың 44,4%-ын құрайды.

Жас ерекшеліктері бойынша көрсеткіштер

Негізгі донор-клубтардың статистикасы келесідей бөлінді:

• U-15 (27 ойыншы): «Атлетико» академиясы – 10 (37%), «Қайрат» – 6 (22,2%), «Ордабасы» – 2 (7,4%).

• U-17 (23 ойыншы): «Қайрат» – 13 (56,5%), ҚФФ Академиясы – 5 (21,7%), «Шахтер» – 3 (13%).

• U-19 (23 ойыншы): «Қайрат» – 13 (56,5%), «Шахтер» – 3 (13%), «Тұран» – 2 (8,7%). (Ескерту: басқа клубтарды ескергенде мұнда «Қайраттың» 14 түлегі ойнайды – 60,9%).

• U-21 (23 ойыншы): «Қайрат» – 4 (17,4%), «Астана», «Ертіс» және «Ордабасы» – 3 ойыншыдан (13%). (Барлығы «Қайраттың» 12 түлегі – 52,2%).

• Ұлттық құрама (30 ойыншы): «Қайрат» – 7 (23,3%), «Астана» – 6 (20%), «Ордабасы» мен «Ақтөбе» – 4 ойыншыдан (13,3%). (Барлығы «Қайраттың» 11 түлегі – 36,7%).

Бұл зерттеуде «түлектер» термині ретінде қазіргі таңда қай команданың намысын қорғап жүргеніне қарамастан, нақты бір клубтың академиясында дайындықтан өткен футболшылар түсініледі. Жалпы көріністе ондаған түрлі клубтар мен футбол орталықтары ұсынылған, алайда статистика еліміз үшін барлық жас деңгейлерінде кадрлық резервті қалыптастыруға алматылық мектептің ең көп үлес қосып отырғанын айқын көрсетеді.