«Словакия – фаворит, бірақ назарды Фарерге аудардық»: Ван ’т Схип Қазақстан құрамасының дайындығы туралы

Қазақстан ұлттық құрамасының бас бапкері Джон ван ’т Схип УЕФА Ұлттар лигасының басталуы қарсаңындағы оқу-жаттығу жиынының алғашқы күндерін қорытындылады. Нидерландтық маман ойыншылармен сөйлескені, Стас Покатиловты күтіп жатқаны және турнирдің тығыз кестесі туралы айтып берді, деп хабарлайды ASnews.kz.

Қалпына келтіру жаттығулары мен ойыншылармен әңгіме туралы

«Кеше жиынның алғашқы күні болды, футболшылар клубтарындағы матчтарынан кейін келді. Аяқтағы шаршауды басып, жігіттерге ойыннан қуаныш сыйлау үшін өте жеңіл, қалпына келтіру жаттығуын өткіздік. Кеше бізге тағы бірнеше жігіт қосылды, бірақ құрам әлі толық емес. Дүйсенбі күні біз тағы бір футболшыны – қақпашы Стасты (Покатиловты – еск.) күтіп отырмыз.

Командада жақсы энергия мен тамаша атмосфера қалыптасқан деп айта аламын. Бүгін екінші жаттығу өтті, мен әр ойыншымен шамамен 10 минуттай жеке сөйлесіп үлгердім. Біз ауқымды жұмыс атқарып жатырмыз, ал Вадим, Нұрбол және Елдос (бас бапкердің көмекшілері – еск.) жаттығу сессияларын белсенді түрде дайындауда. Біз біртіндеп қарқын қосып келеміз», – деді тәлімгер.

Ұлттар лигасы мен ауыр күнтізбе туралы

Сондай-ақ, ван ’т Схип алдағы матчтардан не күтетінін бөлісіп, топтағы қарсыластардың деңгейін бағалады:

«Әлбетте, Словакия – біздің топтың фавориті, бұл ФИФА рейтингінен де байқалады. Бірақ Фарер аралдарына қарсы алғашқы ойынымыз өте маңызды болмақ. Бұл сырт алаңдағы матчқа ұзақ ұшуды қажет етеді, одан кейін бірден Словакияға аттанамыз. Сондықтан қазір бар назарымызды бірінші ойынға аударып отырмыз. Біз біртіндеп командаға өзіміздің ойын жоспарымызды енгізіп жатырмыз.

10-12 күн ішінде төрт матч өткізу – өте ауыр. Бұл біз үшін де, қарсыластар үшін де, футболшылардың өздері үшін де қиын. Ойыншылар бұған дайын болуы керек. Футболшылар тобының үлкен болғаны жақсы, кімді және қалай дұрыс пайдалануға болатынын көреміз. Мен әр ойыншыға дайын болуды ескерттім, өйткені бізге барлығы қажет болады», – деп қорытындылады ван ’т Схип ҚФФ баспасөз қызметіне берген сұхбатында.

Еске сала кетейік, қыркүйектің соңында Қазақстан құрамасы Джон ван ’т Схиптің жетекшілігімен УЕФА Ұлттар лигасының жаңа маусымын бастайды. Топтағы қарсыластарымыз – Словакия, Фарер аралдары және Молдова. Күзгі ойындар күнтізбесі Фарер (26 қыркүйек) және Словакиямен (29 қыркүйек) өтетін сырт алаңдағы матчтардан басталады. Одан кейін қазақстандықтар өз алаңында Молдова (2 қазан) мен Фарер аралдарын (6 қазан) қабылдайды.