Қазақстан құрамасының негізгі қақпашысы кім болу керек? ҚПЛ экс-ойыншысының жауабы

ҚПЛ клубтарының бұрынғы қақпашысы Самат Отарбаев ASnews.kz тілшісіне берген сұхбатында Ұлттар лигасының алдағы матчтарында Қазақстан ұлттық құрамасының қақпасын кім қорғауы керектігі туралы өз пікірін білдірді.

«Саны түгілі, сапасы да жақсы»

«Өздеріңіз көріп отырғандай, құрамада бас бапкердің басы ауыратындай жағдай қалыптасты. Қақпашылар саны жетеді. Саны түгілі, сапасы да жақсы. Бұл – нағыз бас қатыратын сұрақ. Кімнің ойнайтыны – Юрий Алексеевичтің (Қазақстан құрамасының қақпашылар бапкері Юрий Новиков – еск.) еншісіндегі мәселе. Барлығы да жақсы ойнап жатыр», – деді Отарбаев.

Голкиперлердің қазіргі бабы

Сондай-ақ ол әр қақпашының клубтық деңгейдегі көрсеткіштеріне жеке-жеке тоқталып өтті:

«Стас Покатилов «Сабахпен» Чемпиондар лигасында ойнап жатыр, Бекхан Шайзада «Ордабасыда» жақсы өнер көрсетіп жүр. Анарбеков те «Қайратта» жаман емес. Иә, соңғы кезде қателесіп жатыр, бірақ бәрібір ол алматылық клубтың негізгі қақпашысы. Заруцкий да өз деңгейінде. Менің ойымша, төртеуінің де деңгейі жоғары. «Тек мына қақпашы ойнасын» деп кесіп айта алмайсың. Деңгейлері жақсы, сондықтан бапкерлік құрам кімнің негізгі құрамға шығатынын өздері шешеді деген ойдамын», – деді сарапшы.

Сейсеннің құрамаға шақыртылмауы

Маман «Астана» қақпашысы Мұхамеджан Сейсеннің қорытынды тізімге енбей қалуына қатысты да пікір білдірді:

«Мұхамеджан Сейсенді шақырмағаны дұрыс емес деп айта алмаймын. Жаңа айттым ғой, қақпашылар саны көп, сапасы жақсы – бұл тамаша тенденция. Таңдау болғаны жақсы, жігіттер осындай бәсекелестікте өседі. Мұны Мұхамеджан үшін жақсы мотивация ретінде қарастыруға болады, өйткені бәрібір барлығы ұлттық құрамада ойнағысы келеді. Басқа да жас балалар шығып келе жатыр, сондықтан бапкерлік ұжымға біреуін таңдау өте қиын. Күні кеше «Қайратқа» қарсы ойында да Сейсен жақсы өнер көрсетті, матчты көрдім. Құрамаға сәттілік тілеймін! Негізгі құрамда кім ойнаса да, кез келген қақпашы жоғары деңгейде өнер көрсететініне сенімдімін», – деп қосты сарапшы.

Еске сала кетейік, қыркүйектің соңында Қазақстан құрамасы Джон ван ’т Схиптің жетекшілігімен УЕФА Ұлттар лигасының жаңа маусымын бастайды. Топтағы қарсыластарымыз – Словакия, Фарер аралдары және Молдова. Күзгі ойындар күнтізбесі Фарер (26 қыркүйек) және Словакиямен (29 қыркүйек) өтетін сырт алаңдағы матчтардан басталады. Одан кейін қазақстандықтар өз алаңында Молдова (2 қазан) мен Фарер аралдарын (6 қазан) қабылдайды.

Матчтарға дайындық үшін төрт қақпашы шақырылды: Темірлан Анарбеков («Қайрат»), Александр Заруцкий («Ақтөбе»), Стас Покатилов («Сабах») және Бекхан Шайзада («Ордабасы»).

Қоса кетейік, Самат Отарбаев өз карьерасында бірқатар отандық клубтарда өнер көрсеткен, ал бүгінде Қытайдың «Шыңжаң Цзиньдунь» командасында қақпашылар бапкері болып жұмыс істейді.