Ван Дейк: Қазақстан Ұлттар лигасында жеңіске жетеді деп үміттенемін, Оразов командаға көмектесе алады

«Елімай» және Қазақстан құрамасының жартылай қорғаушысы Рамазан Оразовтың агенті Кен Ван Дейк ASnews.kz сайтына берген сұхбатында 28 жастағы футболшының қазіргі жағдайы туралы айтып берді.

«Оңалту жұмыстары сәтті өтіп жатыр. Рамазан алаңға мүмкіндігінше тезірек оралуға тырысып жүр. Бұл кәсібилік мен еңбекқорлықтың нағыз үлгісі. Қайта қалпына келу мерзімі жағдайдың қалай өрбитініне байланысты болады. Дегенмен ол қолынан келгеннің бәрін жасап жатыр.

Қазақстан құрамасымен бірге Ұлттар лигасында жақсы нәтижеге қол жеткізеді деп үміттенемін. Топта жеңіске жетуіміз керек», – деді Ван Дейк.

Рамазан Оразов шілде айында Конференция лигасының бірінші іріктеу кезеңіндегі «Алашкертке» қарсы матчта (1:1) иығын жарақаттап алған болатын. «Елімай» ойыншысы Мәскеу қаласында ота жасатты.

Қалыпқа келуіне алты айға дейін уақыт қажет болуы мүмкін деген ақпарат тарағанымен, Қазақстан құрамасының жартылай қорғаушысы Ұлттар лигасының қыркүйектегі ойындарына дейін қатарға қосылуы мүмкін.

Оразов осы маусымда ҚПЛ-да 15 матч өткізіп, 3 гол соқты, 3 нәтижелі пас берді.

Джон ван ’т Схип шәкірттері Ұлттар лигасында Фарер аралдары, Словакия және Молдова құрамаларымен бір топта өнер көрсетеді.