«ПСЖ-ның видеоларын көрсетті, бірақ стилі жақпады»: сарапшы – Қазақстан құрамасының бапкері Ван ’т Схип туралы

Армениялық Fast Sport басылымының тілшісі Арман Абелян ASnews.kz сайтына берген сұхбатында Қазақстан құрамасының жаңа бас бапкері Джон ван ’т Схиптің Армения ұлттық құрамасындағы жұмысына баға берді.

Комбинациялық футбол мен форвардпен арадағы жанжал туралы

«Ван ’т Схип Армения құрамасын өте сәтсіз кезеңде басқарды. Ол – жақсы бапкер, бірақ оның стилі жай ғана командаға сәйкес келмеді – әңгіме жүйелі, комбинациялық футбол туралы болып отыр. Эдуард Сперцян ойынды талдау кезінде Ван ’т Схип ПСЖ шабуылдарының фрагменттерін көрсетіп, осы компоненттердің кейбірін біздің де ойынымыздан көргісі келгенін айтқан еді. Бірақ Нидерланд маманының уақыты болмады: жаздағы екі жолдастық кездесуден кейін команданы Егише Меликян тізгіндеді.

Бұдан бөлек, Схиптің алғашқы оқу-жаттығу жиыны кезінде-ақ шабуылшы Грант-Леон Раноспен арада үлкен жанжал туындады. Футболшы Грузияға қарсы сырт алаңдағы матч алдында құрама қосынынан кетіп қалды – ал ол ойын Армения үшін өте сәтсіз аяқталды», – деді сарапшы.

Чемпионатты бақылау туралы

«Сонымен бірге Схип жергілікті чемпионаттың көптеген матчтарын тамашалап, қысқа мерзім ішінде құрамаға жаңа ойыншыларды шақырды, олардың бірнешеуі ұлттық құрамада дебют жасады. Ол Еуропада бәсекеге қабілетті болғымыз келсе, Армения лигасы жылдам әрі қарқынды болуы керек екенін жиі айтатын.

Схип – ақылды бапкер. Меніңше, ол өз идеяларын жүзеге асыруға көбірек мүмкіндік пен уақыт беретін клубтық деңгейде үлкен табысқа жете алар еді», – деп қорытындылады Абелян.

Джон ван ’т Схип 2026/27 жылғы маусымдағы Ұлттар лигасының күзгі матчтары басталар алдында Қазақстан құрамасын тізгіндеді.

Нидерланд маманының бапкерлер штабына отандық жаттықтыркшылар кірді: Нұрбол Жұмасқалиев, Елдос Ахметов, Юрий Новиков, Вадим Боровский және Тимур Құсаинов.

Джон ван 'т Схип: өмірбаяны, толық ақпарат, жалақысы, жеке өмірі. Қазақстан ұлттық құрамасының жаңа бас бапкері