ҚФФ Джон ван ’т Схипті таныстырды: Қазақстан құрамасының жаңа бапкерінің штабына кімдер кіреді

Қазақстан футбол федерациясы нидерландық маман Джон ван ’т Схиппен оны ұлттық құраманың бас бапкері лауазымына тағайындау жөнінде принципиалды келісімге келді, деп хабарлайды ҚФФ баспасөз қызметі.

62 жастағы бапкерді ресми тағайындау жақын күндері – ҚФФ Атқарушы комитетінің отырысынан кейін және ұйым жарғысына сәйкес барлық процедуралар сақталған соң жүзеге асырылады. Атқарушы комитет бекіткеннен кейін тараптар келісімшартқа қол қояды.

Бапкерлер штабына кімдер кіреді

Қазақстан құрамасында нидерландық бапкерге отандық бапкерлер штабы көмектеседі:

• Нұрбол Жұмасқалиев – бас бапкердің ассистенті;

• Елдос Ахметов – бас бапкердің ассистенті;

• Юрий Новиков – қақпашылар бапкері;

• Вадим Боровский – дене даярлығы бойынша бапкер;

• Тимур Құсаинов – бапкер-аналитик.

Футболшы ретінде ван ’т Схип амстердамдық «Аякс» пен италиялық «Дженоа» сапында өнер көрсетті, ал Нидерланды құрамасымен бірге 1988 жылғы Еуропа чемпионатын жеңіп алды.

Жолын «Аякс» академиясында бастап, кейіннен амстердамдықтардың негізгі командасын бірнеше рет басқарды, сондай-ақ «Твенте», «Зволле», мексикалық «Гвадалахара» және австралиялық «Мельбурн Сити» (осы ұжыммен 2016 жылы Австралия кубогын жеңіп алды) клубтарын жаттықтырды.

Халықаралық деңгейде нидерландық маман бұған дейін Грекия мен Армения ұлттық құрамаларына жетекшілік еткен.

Джон ван 'т Схип: өмірбаяны, толық ақпарат, жалақысы, жеке өмірі. Қазақстан ұлттық құрамасының жаңа бас бапкері

Арменияда Қазақстан құрамасының жаңа бас бапкері Джон ван ’т Схипке қатысты баға берілді