«Ордабасының» бас бапкері Қазақстан құрамасында жұмыс істеу жайлы қауесетке жауап берді

Шымкенттік «Ордабасының» бас бапкері Андрей Мартин Қазақстан ұлттық құрамасының тізгінін ұстауы мүмкін деген сыбыстарға қатысты пікір білдірді, деп хабарлайды ASnews.kz.

«Ордабасы» сияқты клубта жұмыс істеп жатқаныма өте қуаныштымын. Біз мұндағы жұмысымызды әлі аяқтаған жоқпыз. Бұл жерде әлі қанша уақыт еңбек ететінімізді бір Жаратушы біледі. Клубтағылардың маған деген жылы қарым-қатынасы мен қолдауына көңілім толады. Өткен жылдың қандай ауыр болғаны есіңізде шығар. Клуб басқаша әрекет етуі мүмкін болса да, мені қолдады. Сондықтан мен клубқа өте ризамын және өзімді 100 пайызға сарп етемін. Ары қарай не болады? Оны ешкім білмейді», – деді Мартин.

ҚПЛ-2026 маусымының 18-турында «Ордабасы» өз алаңында семейлік «Елімайды» 3:1 есебімен басым түсті. Алаң иелерінен Бьорн Йонсен, Ги-Марселин Килама және Эльхан Астанов (пенальтиден) гол соқса, қонақтар сапынан жалғыз допты Фессу Плакка еншіледі.

Бұл жеңіс молдовалық маманның шәкірттеріне 43 ұпай жинап, турнирлік кестеде бірінші орынға қайта көтерілуге мүмкіндік берді. Шымкенттіктер «Қайраттан» бір ұпай алда келеді және олардың қосымша бір ойыны бар. Ал Андрей Карпович баптайтын «Елімай» 26 ұпаймен жетінші орында тұр.