Қазақстандық журналист – ұлттық құраманың жаңа бапкері жайлы: Омаров ҚФФ кеңсесінде шетелдік маманмен келіссөз жүргізіпті

Қазақстандық спорт журналисі Эльдар Аманбаев ұлттық құрамаға шетелден бапкер келетінін және алдағы бір-екі күнде тағайындалуы мүмкін екенін айтты, деп хабарлайды ASnews.kz.

«Ұлттар лигасының басталуына бір жарым ай қалды. Қазақстан құрамасында әлі бас бапкер жоқ. Түбі шетелден әкелейін деп тұр ғой бапкерді. Ертерек келсе екен деген ой бар. Себебі ол футболшылармен танысып, сөйлесемін дегенше, ҚПЛ матчтарын тамашалаймын дегенше көп уақыт өтіп кетеді. Оған бір жарым ай жетпейді. Ертең жеңіліп жатса: «мен енді ғана келдім, әлі қазақ футболын дұрыс түсіне алмадым» деген сылтауды алға тартады.

Бір-екі күн бұрын ҚФФ кеңсесінде Марат Омаров жаңа бапкермен келіссөз жүргізіпті. Кешкі сегізде ҚФФ-да жұмыс жасайтын қызметкерлердің барлығын кеңседен шығарып тастап, әлгі бапкермен жеке сөйлескен екен. Оның кім екенін ешкім көрмепті. Бірақ көзілдірік тағатын, егде жастағы адам екен. Бәлкім Марку Канерва шығар. Себебі сол кісі Стамбулдан Астанаға келді деген сыбыстар бар. Бір-екі күнде жаңа бапкердің есімі белгілі болады-ау», – деді Амаебаев «Бірінші бол» арнасындағы подкастта.

Марку Канерва 2016-2022 жылдары Финляндия құрамасын жаттықтырды. 62 жастағы маман қазір жұмыссыз жүр.

Оның тұсында Финляндия Қазақстан құрамасымен төрт рет кездесіп, үшеуінде жеңіске жетті, біреуінде жеңілді.