Армения құрамасының бапкері – Қазақстанға қарсы тең ойын жайлы: екі таймда да жеңе алатын едік

Армения ұлттық құрамасының бас бапкері Егише Меликян Қазақстанға қарсы өткен жолдастық кездесудегі (1:1) тең нәтижеге қатысты өз ойын білдірді, деп хабарлайды ASnews.kz.

«Екі таймда да бізде жеңіске жететін мүмкіндік болды. Қарсыластың бізді өз айып алаңымызға қамап тастай алмайтынын түсіндім, сондықтан шабуылда жақсы ойнай алдық. Алайда өте қарапайым сәттердегі шеберлік деңгейінің төмендігі жеңісті жұлып алуға мүмкіндік бермегеніне қатты қапалымын. Екінші таймда гол соғатын бұдан да көп мүмкіндік туындаған еді.

Эдуард Сперцянның ойынына көңіліміз толады, оны өздеріңіз де көрдіңіздер. Тактикалық тұрғыдан Қазақстан құрамасының айып алаңына дейін еш қиындықсыз жетіп отырдық. Бірақ допты қақпаға енгізе алмау себебіне келсек, футболшылардың жеке басына тоқталып, ешкімді бөліп жарғым келмейді. Бізде биыл мүлдем гол соқпаған шабуылшылар бар. Бұл – алдағы уақытта жақсылап ойланатын мәселе», – деді Армения құрамасының бапкері.

Ереванда өткен Армения мен Қазақстан құрамалары арасындағы жолдастық кездесу 1:1 есебімен тең аяқталды. Матчтың 50-минутында Максим Самородов есеп ашқанымен, араға үш минут салып Эдуард Сперцян таразы басын теңестіріп кетті.

Бұл кездесуде Қазақстан құрамасы сапында бірден үш жас футболшы – Әбинұр Нұрымбет, Мақсат Әбіраев және Максим Самородовқа голдық пас шығарып берген Жасұлан Әмір тұңғыш рет алаңға шықты. Талғат Байсуфинов шәкірттері келесі жолдастық кездесуін 9 маусым күні Венгрияға қарсы өткізеді.