Қазақстан әйелдер құрамасының шабуылшысы: Арменияға қарсы жеңіс үшін ойнадық

Қазақстан әйелдер құрамасының шабуылшысы Анеля Мамырова ASnews.kz сайтына берген сүхбаоында 2027 жылғы әлем чемпионатының іріктеу кезеңі аясында өткен Арменияға қарсы матчтан (1:1) кейін өз әсерімен бөлісті.

«Бүгін бас бапкер жеңіске жетеміз деген міндет жүктеген еді. Әр адам мақсатына жету керек деп ойлаймын. Есепті теңестіре алғанымызға қуаныштымыз. Тең нәтиже тіркеудің өзі оңай болмады. Ойынға қосалқы құрамнан қосылғаннан кейін бар мақсатым гол соғу болды.

Әр футболшының арманы – қай жақта жүрсем де, өз елінің туын желбірету емес пе? Өзімнің де арманым сол. Алла қаласа, қазақ елінің туын желбіретіп, көп гол соғып, жанкүйерлерді қуантамын деп ойлаймын».

Сондай-ақ шабуылшы ішкі біріншілікке дайындығы мен топтағы жағдай туралы айтты:

«Дүйсенбі-сейсенбі күні әйелдер лигасы басталады. Қазақстанға барғаннан кейін демалып үлгеремін деген ойым бар. Демалсақ та, демалмасақ та өз клубымыз үшін ойнап беруге дайынбыз. Бар күш-жігерімізді салып, жеңіске жетеміз деп үміттенемін.

Әрине, тоғызыншы маусым күні өтетін Беларусь – Армения ойынын көремін, өте қызықты болады. Егер олар тең ойнап қалса, бізде топтан бірінші орынмен шығатын мүмкіндік туады».

Қазақстан әйелдер құрамасы 2027 жылғы әлем біріншілігіне іріктеу турнирі аясында Еревандағы «АФФ академиясы» стадионында Армениямен кездесіп, 1:1 есебімен тең түсті. Алаң иелері сапынан 35-минутта Светлана Карагезян есеп ашса, 70-минутта Әмина Бибосынова таразы басын теңестірді.

Бұған дейін С лигасының квалификациясында отандастарымыз Арменияны 3:0 есебімен жеңіп, Беларусьтен 0:1 есебімен ұтылған болатын, кейін дәл сол Беларусь командасынан 1:0 есебімен реванш алды.