Қазақстан құрамасының бапкері – Астановтың құрамаға шақырылмауы туралы: есік бәріне ашық, бірақ бәсекелестік жоғары

Қазақстан ұлттық құрамасының бас бапкері Талғат Байсуфинов «Ордабасының» жартылай қорғаушысы Эльхан Астановтың маусым айындағы жолдастық кездесулерге неліктен шақырылмағанын түсіндірді, деп хабарлайды ASnews.kz.

«Эльхан Астановтың шақыртылмауы туралы айтсақ, біз оның мүмкіндігін баяғыдан жақсы білеміз. Естеріңізде болса, 2022 жылы үш ойыншымызды жастар құрамасынан негізгі командаға тартқан болатынбыз. Олар – Данияр Үсенов, Максим Самородов және Эльхан Астанов. Сол кезде Максим мен Эльханға Францияға қарсы ойында бірден мүмкіндік бердік.

Бірақ уақыт өтіп жатыр, жаңа жастар өсіп келеді. Қазір құрамада бәсекелестік өте жоғары. Ұлттық команданың есігі бәріне ашық, меніңше, жігіттердің өздері де жағдайды жақсы түсініп отыр, ешқандай мәселе жоқ. Егер клубтарында тұрақты әрі жақсы ойнай берсе, күзгі ресми матчтарға дейін әлі уақыт бар. Кімнің дайын екенін күзде көреміз», – деді Байсуфинов.

Эльхан Астанов бұған дейін ұлттық құраманың тұрақты ойыншыларының бірі болған еді. Алайда бас бапкер Талғат Байсуфинов Армения мен Мажарстанға қарсы жолдастық кездесулерге оны шақырмады.