«Бұл клубтың емес, Исламның шешімі»: шотландиялық журналист – Чесноковтың «Хартстағы» болашағы туралы

Британдық The Scottish Sun басылымының журналисі Роберт Мартин ASnews.kz сайтына берген сұхбатында Қазақстан ұлттық құрамасының жартылай қорғаушысы Ислам Чесноковтың қостанайлық «Тобылға» қайта оралуы мүмкін деген қауесетке қатысты пікір білдірді.

«Исламның командада қалып, толыққанды маусымалды дайындықтан өткені өзіне үлкен көмек болар еді. Ойыншының командаға қаңтардағыдай маусым ортасында келуі әрдайым қиындық тудырады. Бірақ бұл жерде мәселе оның Шотландияға бой үйретіп үлгергеніне немесе елге қайтуды қалайтынына да байланысты.

«Хартстың» бас бапкері оны жақсы көреді, Ислам оған ұнайды. Сондықтан, меніңше, бұл клубтың емес, көбіне Чесноковтың өзінің шешімі болады. Ақыр соңында, олар онымен келісімшартқа отыру үшін өте ұзақ күтті», – деді Мартин.

«Хартс» 26 жастағы Чесноковпен осы жылдың қаңтарында 2028 жылға дейін келісімшартқа отырған болатын. Алайда эдинбургтік клуб сапында өткізген жарты маусымда вингер негізгі құрамға тұрақтай алмады. Жалпы алғанда, қазақстандық футболшы барлық турнирде 11 кездесу өткізіп (бес рет негізгі құрамда шықты), бір гол соқты және бір пенальти еншіледі. Оның командасы чемпионаттың соңғы турында «Селтиктен» (1:3) жеңіліп, чемпиондықтан айырылып қалды және жарыс кестесінде екінші орынды місе тұтты.

Бұған дейін Hearts Standard сайтында Чесноковтың трансферден кейін арада тек жарты жыл өткенде Шотландиядан кетуі мүмкін екендігі және оған Қазақстан тарапынан қызығушылық бар екені туралы ақпарат пайда болған еді.

Жақын арада футболшы Қазақстан ұлттық құрамасының орналасқан жеріне барып қосылады және маусым айындағы Армения мен Венгрияға қарсы жолдастық кездесулерге дайындықты бастайды.

Еске сала кетейік, бұған дейін Қазақстан ұлттық құрамасының бұрынғы капитаны Самат Смақов Чесноковтың елге қайта оралуына қарсы екенін айтқан болатын.