Нұрымбет – ұлттық құрамаға шақырту алуы жайлы: басты мақсаттарымның бірі орындалды

«Оқжетпестің» жартылай қорғаушысы Абинұр Нұрымбет ASnews.kz тілшісіне берген сұхбатында алғаш рет Қазақстан ұлттық құрамасының нақты тізіміне енгеннен кейінгі әсерімен бөлісті.

«Ерекше сезімде болдым, ұлттық құрамаға шақыртылғаныма өте қуаныштымын. Біріншіден, сенім білдіріп шақырғандары үшін бапкерлік құрамға алғыс айтқым келеді. Екіншіден, осындай жетістікке себепші болғандары үшін отбасым мен командаластарыма алғыс айтамын. Әрине, әуелі Алла, екінші осы өз еңбегімнің арқасында ұлттық құрамаға шақырту алдым. Шүкір, ең басты мақсаттарымның бірі орындалды. Өз өзіме сендім. Ойынымды жақсы көрсетіп, ұлттық құраманың нақты тізіміне енгім келді», – деді футболшы.

Ағымдағы маусымда 21 жасар Абинұр Нұрымбет көкшетаулықтар сапында барлық жарыстарда 13 матч өткізіп, бір гол соқты. Ойыншының нарықтық құны 225 мың еуроға бағаланып отыр. Бұған дейін ол Қазақстан U-21 жастар құрамасында 11 матч өткізіп, бір нәтижелі пас берген болатын.

Еске сала кетейік, маусым айындағы жолдастық кездесулер аясында Қазақстан ұлттық құрамасы 6 маусымда Ереванда Армениямен, ал 9 маусымда Дебреценде Венгриямен кездеседі.