Покатилов – ұлттық құрама бапкерлері жайлы: Черчесовпен де, Әлиевпен де жеке сөйлеспедім

Қазақстан құрамасы мен әзербайжандық «Сабахтың» қақпашысы Стас Покатилов BorodAbata.kz сайтына берген сұхбатында ұлттық құрамадағы бапкерлер жайлы пікірімен бөлісті.

– Станислав Черчесовтың кезінде ұлттық құрамаға қайта оралып, екі ойынға қатыстың. Онымен жеке әңгімелестің бе?

– Жоқ, тек қақпашылардың бапкерімен сөйлесетінмін. Саламұлымен жеке әңгімелеспедік. Матчқа бір күн қалғанда кімнің негізгі құрамда шығатынын айтатын, бірақ ойын алдында ештеңе талқыланбайтын.

– Әли Әлиевтің келуімен сен алғашқы матчта қосалқы құрамда қалдың, ал екінші ойынға виза дайын болмағандықтан бара алмадың. Уэльске қарсы ойында алаңға шықпадың, бұл шешімді саған түсіндіріп берді ме?

– Бас бапкермен бұл туралы сөйлеспедім, тек Воскобойниковпен [қақпашылар бапкері] кішігірім диалог құрдық. Ол маған: «осы қалпыңда дайындала бер, ертең Заруцкий қателессе шығасың» деп айтты.

– Магомед Адиевтің кезінде ұлттық құрамаға мүлдем келмедің. Оның айтуынша, сен екінші нөмірлі қақпашы болуды қаламаған екенсің.

– Магомед Мұсаұлымен ашық әңгіме болды. Кезекті ОЖЖ алдында мен оған хабарластым. Ол өз көзқарасын, мен өз ойымды жеткіздім. Мен ол кісіден: «қандай жағдай болса да, Шацкий негізгі құрамда ойнай ма?» деп сұрадым. «Егер сіз маған сенбесеңіз, ұлттық құрамаға келуімнің қандай мән-мағынасы бар? Бапкер сіз болсаңыз да, басқа біреу жаттықтырса да, мен командаға көмектесуге дайынмын. Ұлттық құрамаға шақырғанда кеудемді қуаныш сезімі кернейді. Бірақ команданың маған мұқтаж болғанын қалаймын. Ал Адиевтің тұсында бұлай болмағанын байқадым».

Магомед Мұсаұлы жас кезінде мен сияқты болғанын, мұндай жағдайларға сабырлы түрде әрекет ете алмағанын айтты. Оның бұл сөзін түзеттім, өйткені мен спорттық тұрғыда бәсекелесімнен әлсіз екенімді түсінсем, сабырлы бола аламын. Бұл жағдайды басқаша қалай бағалайтынымды білмеймін. Келіп, Шацкийдің жаттығуына көмектесейін бе? Мұны істей алатын басқа да жас қақпашылар бар