«Атлетико» бапкері қазақстандық футбол туралы: өте шапшаң дамып келеді

Мадридтік «Атлетико» академиясы бапкерлер штабының өкілі Карлос Агирре ASnews.kz сайтына берген сұхбатында қазақстандық Глеб Макридовтың Испанияға тағылымдамадан өтуге келуіне қатысты пікір білдірді.

«Глебтің Мадридте болуы Қазақстандағы жастарға үлгі және таланттарға шабыт болады. Оның осында келіп, одан ләззат ала алуы өте маңызды көрсеткіш. Бұл жеке тәжірибе оған футбол жағынан да, тұлға ретінде де көмектеседі.

QJ League – керемет жоба. Оны кім әзірлесе де, ойыншыларға барынша көп жарыс тәжірибесін бере алатын кез келген бағдарлама пайдалы болмақ. Футболшылар өздерін түрлі жолдармен сынай алады. Бәсекелестік неғұрлым көп болса, соғұрлым жақсы», – деп бастады маман.

Қазақстандағы футбол деңгейі туралы сөз қозғаған бапкер мадридтік клубтың басты еурокубоктық турнирде «Астанаға» қарсы өткізген матчтарын да еске алды:

«Өткен маусымдарда қазақстандық клубтың Чемпиондар лигасында қалай ойнағанын көргенімізде, бізде Қазақстаннан өте жақсы мысал бар. Бұл – дамып келе жатқан барлық клубтардың қажырлы еңбегінің нәтижесі. Менің ойымша, қазақстандық футбол өсіп келеді. Соңғы бірнеше жылда ол геометриялық прогрессиямен дамуда.

Мұнда «Астана» келген кезде мен өте жас едім. Есімде дұрыс қалса, біз 4:0 есебімен жеңдік. Астанада ойнау өз алаңымызға қарағанда қиынырақ болды. Ол кезде клубтың өз алаңында жеңіске жеткеніне қуаныштымын.

Қазақстандағы футбол деңгейі соңғы онжылдықта өте жақсы өсіп келеді. Мадридтік «Атлетиконың» Қазақстанда болуы жергілікті қауымдастыққа біздің ДНҚ-ның бір бөлшегін әкеледі. Әрине, барлық әдіснама мәдени деңгейде елдің контекстіне бейімделетін болады. Қайталап айтамын, тізе қоса жұмыс істеу екі тарапқа да орасан зор пайда әкеледі», – деп қорытындылады ол.

Естеріңізге сала кетейік, Freedom QJ League-тің өткен маусымындағы үздік футболшысы деп танылған қарағандылық «Шахтердің» 19 жастағы ойыншысы Глеб Макридов мадридтік «Атлетико» академиясына тағылымдамадан өтіп қайтқан болатын.

2015/16 жылғы Чемпиондар лигасының маусымында мадридтік клуб пен «Астана» бір топта өнер көрсетті. Испаниядағы матч алаң иелерінің 4:0 есебімен сенімді жеңісімен аяқталса, Қазақстан елордасындағы қарымта кездесуде есеп ашылмады.