Чесноков – FIFA Series турниріндегі жеңіс туралы: атмосфераны сағынып қалыппын

Шотландиялық «Хартс» клубында ойнайтын Қазақстан ұлттық құрамасының вингері Ислам Чесноков FIFA Series турниріндегі жеңіс туралы пікір білдірді, деп хабарлайды ASnews.kz.

«Ең бастысы – біз бұл керемет турнирде команда болып жеңіске жеттік. Қазір Ұлттар лигасына дайындалып жатырмыз, сондықтан әр матчқа барынша жауапкершілікпен қарап, бір-бірімізбен байланыс қалыптастыруға тырысып жүрміз. Жігіттер мені өте жақсы қарсы алды, оларды қатты сағынып қалыппын. Осындай атмосфераға қайта оралу өте жағымды әсер сыйлады. Қараша айынан бері мұндай сезімді бастан кешірмеген едім», – деді ол.

Сондай-ақ Ислам Шотландия чемпионатында ойын тәжірибесінің аздығына байланысты өзінің физикалық дайындығы жайлы да ашық айтты:

«Жеке өзім туралы айтсам, соңғы уақытта көп ойнаған жоқпын, сондықтан әлі де болса өзімнің бабыма келуім керек. Маған сенім артқан бапкерлер штабына алғыс айтамын. Алаңдағы әр минут мен үшін өте пайдалы болады», – деді Чесноков.

Қазақстан құрамасы FIFA Series турниріндегі екінші жеңісіне қол жеткізіп, Комор аралдарын 1:0 есебімен ұтты. Кездесудегі жалғыз голды 4-минутта Рамазан Оразов соқты.

Бұған дейін отандастарымыз Намибияны 2:0 есебімен сенімді түрде ұтқан еді. Екі ойында да жеңіске жетіп, 6 ұпай жинаған Қазақстан құрамасы турнир жеңімпазы атанды.