Байсуфинов: Комор Аралдарына қарсы нәтижеге қуандық, бірақ ойын ашуландырды

Қазақстан ұлттық құрамасының бас бапкері Талғат Байсуфинов FIFA Series турнирі аясында Комор аралдарына қарсы өткен матчтан (1:0) кейін өз ойымен бөлісті, деп хабарлайды ASnews.kz.

«Бүкіл жанкүйерлерімізді, елімізді жеңіспен құттықтаймыз. Бұл – ФИФА ұйымдастырған үлкен турнир. Нәтижеге қуанып отырмыз, бірақ ойын сапасы, әрине, ашуландырады. Бір жағынан жігіттерді түсініп те отырмыз: жылдам гол соққаннан кейін Комор құрамасы ашылып, өз ойынын көрсете бастады. Ал біздің жігіттер, керісінше, сол нәтижені сақтап қалуға тырысып, қақпаны аман алып қалу үшін қорғанысқа жатып алды», – деді Байсуфинов.

Дегенмен, бас бапкер мұндай халықаралық турнирлердің ұлттық құрамаға беретін пайдасы зор екенін айтып өтті:

«Енді матчты талдаймыз, ойымыз көп. Бұл кездесулердің осындай форматта өткені бізге үлкен тәжірибе болды. Әсіресе, менталитет пен психология тұрғысынан шыңдалуға септігін тигізеді».

Еске салайық, Қазақстан құрамасы Комор аралдарын 1:0 есебімен жеңіп, FIFA Series турнирінің жеңімпазы атанды.

Жалғыз әрі жеңісті голды ойынның 4-ші минутында Рамазан Оразов соқты.