Байсуфинов – Намибиямен болатын матч жайлы: басты мақсат – Ұлттар лигасына дайындалу

Қазақстан ұлттық құрамасының бас бапкері Талғат Байсуфинов FIFA Series 2026 турнирі аясында Намибиямен болатын матч жайлы пікір білдірді, деп хабарлайды ASnews.kz.

«Бұл біздің 2026 жылдағы алғашқы турниріміз, қайта жиналдық. Барлық жігіттердің көңіл-күйі жақсы, кеше ғана толық құрамда алғашқы жаттығу өткіздік. Ертең Намибиямен ойнаймыз. Бір жағынан, Намибия да, Комор аралдары да Африка құрлығының командалары. Бұл біз үшін қызық ойын болады, себебі біз олармен бұрын-соңды ойнаған емеспіз.

Олардың ойыншылары біздің чемпионатта өнер көрсеткен, дриблинг пен ойын мәнеріндегі мықты тұстарын білеміз. Бірақ олардың ұлттық құрамасына қарсы әлі ойнамадық. Ертеңгі мақсат – жеңіске жету. Сонымен қатар қыркүйекте басталатын Ұлттар лигасына дайындық та маңызды. Бұл турнир – күзгі ойындарға дайындықтың алғашқы кезеңі», – деді Байсуфинов.

Қазақстан мен Намибия арасындағы матч 25 наурыз күні «Астана Арена» стадионында өтеді. Ойын 17:00-де басталады.

Қазақстан FIFA Series 2026 жаңа халықаралық турнирін қабылдайтын елдердің бірі. Турнирге Намибиядан бөлек, Комор аралдары да қатысады.

Қазіргі ФИФА рейтингінде Қазақстан құрамасы 114-орында, ал Намибия 118-сатыда тұр.