Нұралы Әліп Словениядан ұтылған кезді еске алды: басымызды түсіріп 30-40 минут отырдық

Қазақстан ұлттық құрамасының капитаны және петерборлық «Зениттің» қорғаушысы Нұралы Әліп ASnews.kz сайтына берген сұхбатында Еуро-2024 іріктеу кезеңінің шешуші матчында Словенияға жол бергеннен кейінгі (1:2) киім ауыстыратын бөлмедегі атмосфераны еске алды.

«30-40 минуттай тыныштық орнады, ал біз басымызды түсіріп отырдық. Ешкім ештеңе айтпады. Ешкім ештеңе айта алмады. Біз бар күшімізді алаңда сарп еттік. Ешкімде ешқандай кінәлау немесе өкпе-реніш болған жоқ. Бас бапкер (Магомед Адиев – ред. еск.) сол кезде сөз сөйледі, бірақ ол қазір менің есімде жоқ. Душқа түстік те, тездетіп әуежайға кеттік», – деп бөлісті Әліп.

Еске салайық, Еуропа чемпионаты іріктеу кезеңінің шешуші матчы 2023 жылдың қараша айында өтті. Магомед Адиевтің жетекшілігіндегі Қазақстан құрамасы сырт алаңда Словениядан 1:2 есебімен ұтылды. Алаң иелерінің жеңіс голын 86-минутта Беньямин Вербич соқты. Жеңіліске қарамастан, бұл іріктеу кезеңі Қазақстан үшін жинаған ұпайлары мен жеңістер саны бойынша тарихи әрі рекордтық цикл болды.