Гамшиктің экс-әріптесі – Қазақстан жайлы: Еуропада әлсіз қарсылас жоқ

Алматылық «Қайрат» пен Словакия ұлттық құрамасының бұрынғы қорғаушысы Лукаш Тесак ASnews.kz сайтына берген сұхбатында отандасы Марек Гамшиктің Қазақстан құрамасына қатысты айтқан сөздеріне пікір білдірді.

«Марек – біздің футболдағы өте үлкен тұлға, сондықтан бұл тым өзіне сенімді әрі артық кеткен сөздер деп айтпас едім. Дегенмен, бәрі футбол алаңында шешіледі. Қазір әсіресе Еуропада әлсіз қарсылас жоқ. Біздің құрама қарсыластарын менсінбейтіндей жағдайға бармайды, олар тиісінше дайындалып, ойынға дұрыс көңіл-күймен шығады деп ойлаймын», – деді Тесак.

Бұған дейін Словакия құрамасының бұрынғы ойыншысы әрі қазіргі таңда бас бапкердің көмекшісі қызметіндегі маман Марек Гамшик Ұлттар лигасында Қазақстан және Молдовамен бір топқа түскеніне қуанышты екенін айтып, оларды ыңғайлы қарсылас деп атаған болатын.

Еске салайық, УЕФА Ұлттар лигасының жеребесі бойынша Қазақстан құрамасы С лигасындағы үшінші топта Словакия, Фарер аралдары және Молдовамен бірге өнер көрсетеді. Топтық кезең матчтары 2026 жылдың қыркүйек-қараша айлары аралығында өтеді.