Әліптің жұбайы – Ресейге көшу жайлы: қаралымнан өтсе, мені өзімен бірге алып кетуге уәде берді

Қазақстан құрамасының капитаны мен петерборлық «Зениттің» қорғаушысы Нұралы Әліптің жұбайы Әйгерім ASnews.kz сайтына берген сұхбатында футболшының ресейлік тклубқа ауысуы қандай қиын жағдайда өткенін есіне алды.

– 2022 жылы Нұралы «Зениттен» шақырту алды. Ол кезде сізге не деді?

– 2021 жылдың желтоқсанында біз Нұралының туған күнін атап өттік. Дәл сол кезде «Зенит» оны қаралымға шақырды. Мен ол үшін қатты қуандым, өйткені ол үнемі осындай үлкен клубтарда ойнауды армандайтын. Кейін елде қаңтар оқиғасы басталды. Алматыға таксимен әзер жетіп, Нұралының төлқұжатын алдық та, ол Қырғызстан арқылы Ресейге ұшып кетті.

«Зенитпен» келісімшартқа отырғаннан кейін ол мені Санкт-Петербургке шақырды. Алайда менің әкемнің көзқарасы консервативті. Ол маған асықпауымды сұрады, себебі ондай үлкен қалаға көшу оңай емес. Әкем: «егер отбасын құратындарыңа сенімді болсаңдар, мен қарсы емеспін. Бірақ неке куәлігі болуы шарт. Одан кейін Питерге де, Юпитерге де бара беріңдер», – деді.

Қазақстан консулдығында жұмыс істейтін жігіттерге алғысымды білдіргім келеді. Біз 21 сәуірде бір күн ішінде некемізді тіркеп, содан кейін мешітке барып неке қию рәсімін өткіздік.

Еске салайық, Нұралы Әліп санкт-петерборлық «Зенитке» алматылық «Қайраттан» 2022 жылдың басында ауысты. Бастапқыда қорғаушы жалға алынған болатын, кейін ресейлік клуб оның келісімшартын толық сатып алды.